Сорта тулнам йӧрташ ок пу Олор мастар

Сорта тулнам й1255;рташ ок пу Олор мастарМай тылзын пайремже-влакым Параньга район Олор кундемысе калык куанле кумыл дене вашлиеш. 30 апрельыште верысе школын туныктышо ден тунемше ешыже, кугезе коча-кованан мастарлык куатыштым шарналтен, шке кидмастарже-влакым иктеш чумырен, вашлиймаш-пайремым эртарыш. Вургемым тӱрлен, урген сӧрастарыше-влак Анна Чернова, Валентина Иванова, крючок дене пидше Галина Алексеева, озанлык кӧргыштӧ кучылталтше арверым ямдылыше изак-шоляк-влак Николай ден Евгений Фадеевмыт, сӱретче Аркадий Данилов, сӱретче, пу гыч ӱзгарым, сувенирым пӱчкедыше мастар-влак Сергей Иванов, Александр Порфирьев, кӱртньӧ мастар-влак Николай Тимофеев, Евгений Ямаев, издерым ыштыше Владимир Романов, комдым тодшо Алексей Чермаков, куштызо Алексей Алексеев шке усталыкыштым ял калыклан, толшо уна-влаклан выставкыште ончыктышт. Вара кажныже шке паша верышкыже верланен, мастарлык урокым темлышт.

Уна-влакше ты кечын шыҥ-шыҥ погыненыт ыле. Школысо икшыве-влак, ял калык поро кумыл дене Йошкар-Ола гыч Туныктышо-влакым усовершенствоватлыше институтын паша делегацийжым, Параньга районым вуйлатыше А.А. Ибраевым, Марий Эл Республикын культура, печать да национальность паша шотышто министрын алмаштышыже В.И.Актанаевым, Марий Эл Республика деч Россий Кугыжаныш Думын депутатше, Мер Каҥашым вуйлатыше Л.Н.Яковлевам вашлие. Кажне унам икте ӧрыктарыш: нине кидмастар-влак чыланат Олор ялын шочшыжо улыт. Таче нуно тӱрлӧ кундемлаште илен, тӱрлӧ пашам ыштат гынат, чыланат шочмо мландын куатше дене шӱлат да ты юзо шӱлышышым шке пашашкышт шыҥдарат.

- Мастарлык дене ойыртемалтше, калык пагалыме йолташна-влакым иктеш чумыраш шонымаш кок ий ончыч шочын. Тылеч вара верысе интеллигенций ятыр гана вашлийын мутланен, шочмо мландым тӱзатыме сомылым шуктен, калыкым шке паша дене куандараш ямдылалтын, - каласыш пайремым почмо годым верысе муниципал образованийым вуйлатыше Ю.А.Сидоров. Вуйлатышын мутшым Олорыш пурымо корнывожышто ял палым вераҥымат (Е.Ямаевын пашаже) пеҥгыдемда.

Кидмастар-влак чон йодмо, йӧратыме пашашт дене гына огыт серлаге. Тӱрызӧ А.Чернова зоотехниклан тыршен, почтым вуйлатен, ачаж деч коҥга опташ тунемын. Тудо ялыште чылаже 8 пӧрт коҥгам да 15 монча коҥгам оптен. И.Палантай лӱмеш СХПК-ан бухгалтерже мешак куэмыште ырес дене тӱрлымӧ мастарлыкым кыдалаш ийготан ӱдыр-влакын чонышкышт шыҥдара. Тидымат палемдыде огеш лий: кидмастар-влак кокла гыч лачак Н.Тимофеев, С.Иванов, А.Порфирьев, А.Данилов гына усталыклан изинек тунемыныт да ты корно денак шинчымашым поген, профессийым ойыреныт. Нунын пашашт нерген таче Марий Элыште веле огыл, Российыштат, йот эллаштат сайын палат. Теве Сергей Ивановын пу гыч пӱчкеден лукмо маска, шордо, имныже-влак ончышо-влаклан поснак келшат. Уста мастар-влак моторлык нерген умылымашым шке сурт-оралтым, сад-пакчам йӧнандарен чоҥымашке шыҥдарат да тӱрлӧ конкурслаште, фестивальлаште шке куатыштым тергат.

- Олор мланде, тысе калык моло деч чотак ойыртемалтеш, - палемдыш Параньга районым вуйлатыше А.А.Ибраев. – Нуно келшен пашам ыштат, чыла шотыштат ончылно улыт. Кидмастар-влаклан поян улмышт нерген ятыр гана колынам, но тынар мастар улмо нерген таче гына пален нальым.

Шочмо мландым чапландарен илыше кидмастар-влакын сеҥымашыштлан куанаш гына кодеш. Тидын нергенак палемдыш Россий Кугыжаныш Думын депутатше, Мер Каҥаш вуйлатыше Л.Н.Яковлева:

- Мый таче Олор ялыште эн сай марий койышым ужым. Тошто илыш йӱла радам калыкын чоныштыжо аралалт кодын да тачат илышнам тӱзаташ полша. Тау проект дене пашам ыштыше туныктышо-влаклан, тау кидмастар-влаклан, тау ял калыклан кугезе илыш йӱлам, усталыкым арален, чапландарымыштлан.

Марий Эл мучко лектын коштмо годым, тӱрлӧ вашлиймаште «ял пыта, калыкна пыта» манме азапланыме шонымашым чӱчкыдынак колаш лиеш. Тунамак титаканымат кычалаш пижына. А Олорышто чылажат вес семын. Такшым кидмастар-влакым уш мастар-влак шочыктат. Олор калык тӱвыра поянлыкнатам ятыр лӱм дене пойдарен. Елизавета Коновалова, Зоя Иванова, Максим Делянов, Александр Ороспаев, Надежда Никитина, Татьяна Очеева, Эльвира Кочепгина… Ял калык ила, пашам ышта, таза уш-акылан самырык тукымым куштен, эрласе кечыш ӱшан дене онча. Тыге илаш мыланна кӧ чара?..

Зоя Дудина
E-mail: dudina62@mail.ru

Санян Вачи - Олор ялем (mp3)
скачать dle 10.2 КиноСвин
Автор: user | Дата: 6 мая 2008 | Просмотров: 4387 Коментарии: 1
#1 написал: mari-rus (7 мая 2008 07:03)
- Олор мланде, тысе калык моло деч чотак ойыртемалтеш, - палемдыш Параньга районым вуйлатыше А.А.Ибраев. – Нуно келшен пашам ыштат, чыла шотыштат ончылно улыт. Кидмастар-влаклан поян улмышт нерген ятыр гана колынам, но тынар мастар улмо нерген таче гына пален нальым.

Пынеге! Шке районышто мо улмым ок пале! Тыге нуно марий калыкым пагалат! А шке жапыштыже марий-влак нуным илаш пуртеныт!
      • Для того чтобы написать комментарий к этой новости, пожалуйста, нажмите сюда.


      Яндекс.Погода Яндекс.Метрика
      Архив новостей
      Популярные новости