Поро лийже, иза-шольо, ака-шӱжар-влак!

Таче шочмо элна Сеҥымаш кечым пайремла.

Тушман дене кучедалаш икымше кечылаштак Марий Эл гыч 25 тӱжем утла патыр каен. 1418 йӱд да кече шуйнышо шучко сарыш Марий кундемна гыч 130 тӱжем наре еҥ каен. Тышечын 75 тӱжемже сӧй мландеш вуйжым пыштен але увер деч посна йомын.

Марий кундемеш шочын кушшо 40 утла еҥлан Совет Союз Герой лӱмым пуымо. Нуно колмаш нерген шонен огытыл. Кушто нелырак, лач тушко уло шӱм дене каеныт. Лач тыгай еҥ-влак гына шочмо элнам фашизм деч арален коденыт. Кӧргӧ вийым, ӱнарым, мутат уке, шочмо мланде пуэн да умбакыжат пуаш тӱҥалеш.

Туаштена Сеҥымаш кечым пӧлеклыше ветеран-влаклан. Тау тыланда шке илышдам мемнан волгыдо ончыкылык верч пуымыланда.

Вуйым пыштыше кажне салтак ончылно парымнам умылен ме ойлена: Кийыме верышт мамык дечат пушкыдо лийже, мӧҥгӧ толын-коштмо корнышт сорта дечат волгыдо лийже!

Пайрем дене!

Лариса Яковлева, Россий Кугыжаныш Думын депутатше, Мер Каҥаш вуйлатыше
(саламлымаш, mp3)

Тачысе увер йогына Сенымаш кече дене кылдалтше лиеш.

Сеҥымаш кечылан пӧлеклалтын у йӱла шочын. Кажне ийын 9 майлан пӧлеклалтше лӱйкалмаш дене турнирым эртара. Тыште 4 ведомство коклаште ӱчашымаш эрта. Тений 6 майыште Кугыжаныш погын, Йошкар-Ола депутат-влакын погынымаш гыч, Эл кӧргӧ паша министерстве да Федерал аралтыш службо Виктем пашаеҥ-влак коклаште тыгай таҥасымаш эртен. Федерал аралтыш службо пресс-службын палдарымыж почеш, куснышо Кубок да 1 степеньян диплом дене Федерал аралтыш службо пашаеҥ-влакым палемдыме. 2 да 3 верыш Кугыжаныш погын да Эл кӧргӧ министерстве пашаеҥ-влак лектыныт.

Сеҥымаш кечылан пӧлеклалтше ятыр мероприятий кундемыштына эрта. Тыге 8 майыште Йошкар-Олаште Кугу Отечественный сарын ветеранже-влакым Йошкар-Олан историйже тоштерыште саламлаш тӱҥалыт. Тышке 36 ветераным ӱжыктеныт. Нунылан Палантай лӱмеш колледжыште тунемше студент-влак пайрем концертым ончыктат. Тыгак вӱдшор тылзыште почто кыл пашаеҥ-влак школышто тунемше-влаклан Сеҥымаш кечылан пӧлеклалтше конкурсым увертарен ыле. Каласаш кӱлеш, конкурсыш тунемше-влак уло кумылын ушненыт. Тунемше-влак чылажге 150 таумут дене ветеран-влаклан серышым возеныт. Лачак ты тоштерыште ветеран-влаклан тиде серыш-влакым кучыкташ тӱҥалыт.

Тыгак 8-9 майыште Йошкар-Олаште Евсеев лӱмеш Марий кугыжаныш тоштерыште Почмо омса эрташ тӱҥалеш. Тыште сар годсо ӱзгар ден арвер, экспонат-влакым калык ончыко луктыныт. Тыгак 8 майыште Ленин лӱмеш тӱвыра полатыште 15 шагатлан Сеҥымаш кечылан пӧлеклалтше пайрем концерт эрта.
9 майыште Сеҥымаш кечын 8 шагатат пелылан Марков шӱгарлаште сеҥымаш верч вуйым пыштыше салтак-влакым шарныме лӱмеш пеледышым пыштымаш лиеш.
...

Шорык.
У пашалан уло вийдам пуаш логалеш. Но ида лӱд – лектыш куандарыше лияш сӧра.

Презе.
Тендам пырля веселан каналташ, дискотекыш ӱжын кертыт. Ушныза. Но нигӧлан мутым ида пу, вара ӧпкелен кертыда.

Йыгыр.
Кычалтылше койышдам ончыкташ ида тырше. Вурседылмаш да коклаш пурымаш деч кораҥза.

Рак.
Ончылно тендам моткоч кугу паша вуча. Таче каналтыза – вийдам погалтыза.

Лев.
Таче ятыр вучыдымо уверым колыда. Кажныжым радамлен лекса, йоҥылыш умылен кертыда.

Ӱдыр.
Могай кумылан таче тендан йолташда-влак лийыт – тендан деч шога! Нуно пытартыш жапыште поснак тендан дек шӱмаҥ шуктеныт. Сандене пайрем кумылыштым ида волто!
...