Поро, шокшо, сай салам, лийже марий калыклан!!! Ну мо, вучен шуктышда коеш, угыч тендан деке «Семсалма» рубрике дене, мый Рауль Гарифулин вашкем. Ты гана ме – «Инди» семтолкын нерген мутнам вашталтена. Те шукын очыни «Инди», йымач удыралам, семтолкын нерген колын улыда, ну кеч пел пылышда дене, уке, уке, те ида шоно, тиде ялт Радж Капурын, да Рики-Тики-Тавин шочмо кундемысе семтолкын огыл.

«Инди» - толкын семын, Индий кундем дене нимынярат чак кылдалтын огыл. Кӱчыкын тудо тыге йоҥга, а кужун каласаш гын – индепедент рок семын мыланна палыме. Руш йылме дене каласаш гын – «независимый рок» семын кусаралтеш. Тудо, ты семтолкын, 1980-шо ийла кыдалне шочын. Кызыт тудо, инди – рок гына огыл, а улыт эше: инди-поп, дрим-поп, нойз-поп, тыгак брит-поп – чыланат нуно инди-рок толкын гыч шочыныт.

Очыни тендам ик йодыш тургыжландара: мо дене вара, ты толкын тыгай ойыртемалтше? Вашештен ончем. Тыште, моло толкын семынак, музыканче шкенжым куштылгын шижеш. Тыгак кугу верым экспериментлан ойырат, тергат Кузе йӱкым, тыгак койыш-шоктышым. Шукыж годым тыгай муро, Але семым, изи гына аудиторийыште колыштыт. Индии-рокер-влаклан нимогай чарак уке, йӱк яндарлык нуным нимынярат огеш тургыжландаре, нуно иканаште соло гитарымат кугемден кертыт, тыгак ритмым ваштелтен сеҥат. Кужыт шотыштат, тидымак каласаш лиеш.

Индии толкын дене тыгай чот йӧратат эксперимент-влакым эртараш, тыгай чот йӧратат, эсогыл, мутлан муро дечын вара, ончаш да колышташ толшо калык йӱкын ойлат: «Вот нуно кертыт!!!»

Тыгак «Инди» семтолкыным изиш проста, изиш шонаш таратыше, удан возымо, шагал ужалалтше, изиш пелекӱчымӧ манын кертыт, но тиде толкын уло, да тудо илаш тӱҥалеш, тыгай тудо – «Инди».

Тидын дене мыйын чыла, а мучашлан ик пример – Blur группым колышт налаш темлена. Сай кодса, вес Гана эфирыште вашлиймеш!!!

Рауль Гарифулин

Семсалма (mp3)

Йоча-влакын кеҥежым каныме верышт шагалем толеш. Тений кеҥежым 330 тазалыкым шуарыме да каныме тӧнеж пашам ышташ тӱҥалеш. Тышечын 23 ола ӧрдыжтӧ, 244-ше – школ пелен, 57 – профильный лагерь лиеш да 6 йоча санаторий улыт. Тидын нерген Роспотребнадзор Виктем пресс-службо палдара. Кодшо ий дене таҥастарымаште тений ыштышаш каныме тӧнеж-влак 16 лагерьлан шагалрак лийыт. Тидыже июнь тылзе гыч школлаште ачалыме паша тӱҥалме дене кылдалтеш. Каласаш кӱлеш, тений каныме да тазалыкым шуарыме тӧнежлаште 88,5 школышто шинчымашым погышо йочан тазалыкшым пеҥгыдемдаш палемдыме. Тӱшка ончымаште – тиде 84% лиеш. Палемдыман, тиде показатель кодшо ий дене ончымаште 1167 тунемшылан шукырак. Лагерьым кеҥеж жаплан ямдылыме паша годым, эпидемий ылыжме ваштареш профилактикым да санитар-гигиене пашам эртарат. Тачысе кечылан 70 % утла ыштышаш пашам шуктымо. Ачалыме пашалан ойырымо 21 миллион 993 тӱжем теҥге гыч 65 % кучылтмо. Тидыже 14 миллион 296 тӱжем теҥгеш шуэш. Тыгак лагерьлаште палемдыме пашам шуктымым эскерен шогат. Кеҥеж жапыште тазалыкым шуарыме тӧнежлаш каяшлан ик путевкын акше 7 200 теҥгеш шуэш.

12 майыште тӱнямбал медшӱжар кече вашеш Йошкар-Олан медколледжыште пайрем эртен. Тиде кечылан пӧлеклалтше пайрем кажне ийын ты тунемме тӧнежыште эртаралтеш. Тыште туныктышо да студент-влакын сай паша лектышым ончыктымыштым палемденыт. Идалык мучко ойырен налме теме-влак почеш шымлыме пашам возымым иктешленыт. Тыгак «Марий кундемыште медшӱжар пашан историйже» шымлыме пашан докладшым колыштыныт. Ӱпӧ олаште Юл кундемысе медшӱжар-влакым ямдылыме конкурсыш мийыше Ксения Быкова еш идалык нерген студент-влаклан палдарен. Каласаш кӱлеш, Йошкар-Оласе медколледж дене 18 да 30 № школ-влак кылым кучат. Тышке школышто тунемше-влак шинчымашыштым пойдараш коштыт. Тений тиде тунемме тӧнежым 200 наре выпускник тунем лектеш. Тыгак отделений вуйлатышын Нина Плотникован палдарымыж почеш, шинчымашым келгемдаш манын кӱшыл тунемме тӧнежлашке 10-15% тунем лекше-влак каят.
...