«Кеҥеж толмо ден шокшо вӱдым чареныт» 2 июнь гыч Йошкар-Олаште шокшо вӱдым чареныт. Тидыже ТЭЦыште кеҥеж ачалыме да тергыме пашам тӱҥалме дене кылдалтын. Тыгак 4 гыч 6 июнь марте пӧртлаште йӱштӧ вӱд эркын толаш тӱналеш. Тидыже вӱд налме верыште вӱд темдыме куатым иземдыме дене кылдалтеш. Шокшо вӱд деч посна илыме жап 23 июнь маре шуйна.

«Йоча киностудий Россий кӱкшытысӧ кино форумыш кая» Марий кундемысе тунемше-влак сеҥыше радамыште улыт. Республикыште эртаралтше йоча кинофестивальыште Йошкар-Оласе 27-ше номеран школ гыч «Трек» лӱман киностудий финалыш лектын. Нуно «На краю» фильм дене Марий Эл Республикысе наркоконтроль виктемын лӱмын ямдылыме призшым сеҥен налыныт. Тений ты пашам Россий кӱкшытыштӧ эртаралтше форумышто аклаш тӱҥалыт. Тудо сентябрь тылзыште Шем теҥыз воктене «Орлёнок» йоча рӱдерыште лиеш. Марий кундем гыч кок тунемше кая – Анастасия Макарова ден Юлия Янаева. Палемдыман, 27-ше номеран школышсо киностудийыште шуко кином сниматленыт. Нунын коклаште наркоманий йодышым тарватыше фильм-влакат улыт.

«Кеҥеж шуын – йӱштылаш вер кӱлеш» Оласе муниципал службо-влак кеҥежлан рӱдӧ каныме верым (пляжым) ямдылат. Изи икшыве-влаклан йоча площадкым, а кугыеҥ-влаклан волейбол дене модаш, канаш да йӱштылаш верым ыштат. Тений йӱштылмӧ сезон 9-ше июньышто почылтеш. Кызыт Какшан сер тӱр канаш келыштарыме верыште пашам мучашлат. Кӱлеш верым пече дене авырат, мушкылташлан умывальник-влакым келыштарат, вургемым вашталтен чияшлан кабин-влакым вераҥдат, вӱд серыш ошмам кондат. Кажне ийын пляж олмышто шудо кушкеш, а тусо ошма шошымсо вӱд дене мушкылтеш. Сандене ий еда ошмам ешарат. Олаштына йӱштылаш келыштарыме вер икте веле – рӱдӧ пляжыште. Тыште водолаз-влакат вӱдым тергеныт. А моло вере йӱштылаш огеш лий, сандене тидым шотыш налман. Молгунамсе гаяк тушто медицин пашаеҥ ден утарыше-влак эскерат. Нуно кажне кечын 9 гыч 19 шагат марте дежуритлаш тӱҥалыт. А йӱдым пляжым ороллан ӱшанат. Чыла пашалан 600 тӱжем теҥге оксам ойырымо.
...