«Кӱртньӧ кайык кавашке кӱза» Йошкар-Оласе аэропорт уэш пашам тӱҥалеш. 1-ше июль гыч Йошкар-Ола гыч Москош самолет дене чоҥешташ лиеш. Тыге кум авиакомпанийын самолетшо-влак калыкым шупшыкташ келшеныт. Тиде «Регион Авиа», «Бугульминские авиалинии» да «Евразия» компаний-влак. Пассажир-влак ЯК-40 маркан самолет дене чоҥештылаш тӱҥалыт. Тыгай самолет иканаште 30 еҥым наҥгаен кертеш. Тудын писылыкше ик шагатыште 510 меҥге марте шуэш. Йошкар-Ола гыч рейс кажне кечын лиеш. Билетын акшым тӱжемат 900 гыч 5 тӱжемат 500 теҥге марте палемдыме. Ончыкыжым Йошкар-Ола гыч Санкт-Петербургышкат рейсым почаш шонымаш уло. Тидлан эше икмыняр ЯК-40 да Бразилий гыч самолет-влакым налаш палемдыме.

«Уэмдыме машина-влак шукемыт» Туткар лийме годым вашке полышым пуышо машина-влак кундемыштына шукем толыт. Тыгай машинан чотшо 16 марте шуын. Уэмдыме модельан Газель автомашинам икымше гана январь тылзыште налме. Каласаш кӱлеш, тыгай машинан акше 750 тӱжем теҥгеш шуэш. Кызыт туткар годым утарыше службо пашаеҥ-влаклан автомашиналан келыштарыме йӱж дене темыме кӱпчыкым налаш шонат. Тидыже ий ӱмбалне утарыме пашам эртарыме годым кӱлеш.

«Салам кеҥеж! Салам «Ямде лий»!» Тыгай вуймут ден «Ямде лий» газет 3 июньышто 75 ияш лӱмгечжым пайремлен. Курчак театрыште 50 наре чолга Юнкор-влак погыненыт. Тыште шкешотан идалыкым иктешлымаш лийын. Сылнымут дене кылым кучышо-влаклан лауреат лӱм дене палемдалтыныт. Тиде «Ямде лий» газетын икымше редакторжо Зинаида Яковлева, Антонов Ивук лӱмеш да моло премий дене йоча-влак палемдалтыт. Лӱмгече пайремым юнкор-влак шке мастарлыкышт дене сӧрастареныт. Палемдаш лиеш, 75 ияш лӱмгечылан «Ямде лий» газет пашаеҥ-влак у книгам ямдыленыт. Тудо «Шергакан «Ямде лий» йолташна!» маналтеш. «Газетын вияҥ толмо корныжым шергалше книга» - тыге палемден Лидия Семёнова, газетын тӱҥ редакторжо.
...