«Самырык тукым наркотик ваштареш». 1 июнь гыч 26 июнь марте Россий мучко наркотик ваштареш акций-влак эртат. Нуно «Кушто колымаш ила, палдаре!» лӱм дене эртаралтеш. А Марий Элыште черетан «Наркостоп» мероприятий 7 июньышто Никонов лӱмеш площадьыште эрташ тӱҥалеш. Палемдыман, «Наркостоп» акций Йошкар-Олаште 24 майыште лийшаш ыле. Но йӱран игечылан кӧра, 2 арня вара 7 июньышто эртараш палемдыме. Тыште «Солдаты удачи» пейнтбол клуб, «Ночные волки», «Ангелы дорог» байк-клуб, тыгак тул-шоу лиеш. Касын ойыртемалтше ужашыже – тиде «Стартинейджер» конкурс. Тыште куштымашым ончыктымо дене 9 команде таҥасаш тӱҥалеш. Тыгак ончаш толшо-влак шке кумылын экспресс-тестированийым эртен кертыт. Тиде годым айдемын кап-кылыштыже психоактивный вещества улмым тергат. Лач тиде мероприятий самырык тукымым шкалан ӱшанашлан ышталтеш. Вет андреналиным наркотик деч огыл, а келшыше паша гыч налын мошташ кӱлеш.

«Шӧр кочкыш шотышто у тӧртык (закон) лиеш». Кугыжаныш Думын 3-шо лудмаштыже депутат-влак шӧр кочкыш дене кылдалтше у законым пуртеныт. Шӧр кочкышышто тӱрлӧ ешартыш вещества уло гын, пакет ӱмбалне «шӧр», «торык», «нугыдемдыме шӧр» але «ӱй» манын возаш огеш лий. Ончыкыжым лач ушкал шӧр ӱмбалан гына «шӧр» мутым возаш тӱҥалыт. Ты тӧртык (закон) пел ий гыч илышыш пурышаш.
...

Мутшо Серафим Антроповын
Семже Валентин Милютинын

Рвезе годсо пагыт, вашлиялме пагыт,
Уш гыч нигунам от лектын кай.
Мыланемже тые улат ныжыл лыве,
Мый лийнем тылат пеледыш гай.

Припев:
Шого таҥем, шого,
Шоно, кеч ит шоно,
Лӱмешемак шочынат улмаш.
Пале, шарне, пале,
Шошо вӱд гай тале,
Авалтен шӱмем йӧратымаш.
...