Марий тӱвыра рӱдер вес кундемлаште илыше тӱвыра пашаеҥ-влакым Йошкар-Олшаке пога. Семинар 9 гыч 13 июнь марте эрташ тӱҥалеш. Ты туныктымо семинарыш пошкудо кундем гыч 20 наре специалист-влак толшаш улыт. Нуным шошо-кеҥеж йӱла пайрем-влак дене палдараш тӱҥалыт. Тыште Ӱярня, Агавайрем Кугече, Семык, Пеледыш пайрем-влакын эртарыме радам нерген каласакалат. А практик ужашыште 12 июньышто рӱдӧ тӱвыра да каныме паркыште эртыше Пеледыш паремым ончыктат. Тыгак районлашкат лектыт. Кышкар почеш, Марий кас да этнодискотеке лийшаш. Семинарым иктешлыме семын йыргешке ӱстел эртышаш. Марий тӱвыра рӱдер уна-влаклан пуэдышаш материал семын «Полыш кид» методический сборникым ямдылен.

Пазарыште свежа пакча саскалан ак кушкеш. Процент дене ончаш гын, ак 3,6% кӱзен. Каласаш кӱлеш, поснак ковышта, кешыр да ушменлан ак ойыртемалтын кугем толеш. Тыгак нӧшмӱй, сакыр, ложаш да муно шергештыт. А теве шӧр да сырлан ак, мӧҥешла, волен. Кевытыште тылзе жаплан кочкаш налме ак, кокла шот дене 2 155 теҥеш шуэш. Тидыжым Маристат специалист-влак палемдат.

Йӱштылаш жап шуын, а игече «Вӱдыш пураш огеш лий» манеш. Йӱштылаш пурымо жапым 9 июнь гыч палемденыт. Тений марий кундемыште йӱштылмӧ жаплан 36 пляжым почмо лиеш. Кажне ийын кугыжаныш инспекцийын пашаеҥже-влак каныме верым ончат, изирак пуш ден катерлан шогалаш лийме верым техник могырым тергат. МЧС Марий элысе ятыр йӱштылаш йӧршӧ верым сайлан шотленыт. Но тидлан лач игече гына келшен толшо огыл. Каласен кодена, 2008 ий тӱҥалтыш гыч Марий кундемыште икмыняр еҥ вӱдыш пурен каен. Пытартыш гана тыгай азап Юл ден Изи Какшаныште лийын. Утарыше-влак эше ик гана ушештарат, вӱд айдемылан энгекымат конден кертеш. Сандене эҥерышке але ерышке пурымо годым пеш чот тӱткӧ лийман.
...