«Телым сайын илен лекташлан кургым ямдылыман». 6 июньышто ял озанлык министерствыште каҥашпогын эртен. Тыште 5 тылзе жапыште вольык ончымо пашам иктешленыт. Телым вольыкым ашнашлан верым да кургым ямдылыме йодышым лончыленыт. Виктер вуйлатын икымше алмаштышыже Александр Егошин специалист-влаклан тӱткытым ялысе калыкын вольыкым ашнымылан ойыраш палемден. Кодшо ий дене таҥастарымаште теле шапашым ямдылыме дене тений 2 арнялан вараш кодмо. Но 20 июнь марте отызан культур-влакым ӱдаш лиймым палемденыт. Каҥашпогынышко толшо-влак «Семеновский» племзаводын шӧр комплексышке миеныт. Тушто сенаж ямдылымым онченыт.

«Тунемше-влак гына огыл, вуйлатыше-влакат экзаменым кучаш тӱналыт». Оласе мэр ден ялсовет вуйлатыше-влак шке пашаштым палыме шотышто экзаменым кучаш тӱналыт. Тидлан федерал кучем лӱмын тергымашым ямдылен. Район да округ вуйлатыше-влакын пашаштым 30 критерий почеш аклагш палемдыме. Тыште бюджет оксам кучылтмым, туныктымо пашан вияҥмыжым, калыклан илыме верым ыштымым да тулеч молымат ончат. Кучем пашаеҥ-влакын мутышт почеш, тергымашын лектышыж дене калыкымат палдарат. Тыге нуно шке илышыштым пошкудо районла дене таҥастарен кертыт. Шкешотан экзаменым регионласе губернатор-влакат кучышаш улыт.

«Йоча-влак утарыше радамыш шогалыт». «Самырык утарыше» регионгокласе таҥасымаш Самара кундемыште 8 гыч 15 июнь марте эрташ тӱҥалеш. Тушко Марий Эл республикын чапшым аралаш 10 тунемше каен. Ӱчашымаш годым йоча-влак 8 кече лагерьыште илаш тӱҥалы. Да шке моштымыштым, палымыштым, вийыштым эстафетыште, кроссышто, кычалме да утарыме пашате ончыкташ тӱҥалыт. Тыгак жюри пырдыж газет ыштымым да мурым йоҥгалтарымым аклаш тӱҥалеш. Увер дене МЧС викемын пресс-службыжо палдарен.
...