«Йочам канаш колтымо деч ончыч - шоналтыза!» Тыге Госпожнадзор да эпидемиолог-влак ача-ава-влакым шоналташ ӱжыт. Молан манаш гын, 23 йоча каныме вер гыч 5-ше тул азап лӱдыкшыдымылык дене тергымашым эртен огытыл гын, 7-ше эпидемиолог-влакын йодмашышт дене огыт келше. Тиде «Яльчик», «Молодость» «Сосновая роща», «Орловка», «Чародейка» Юрий Гагарин, Сергей Тюленин лӱмеш йоча каныме вер-влак. Пожар лийме деч аралыше службын палдарымыж почеш, пытартыш 4 ий жапыште йоча тазалыкым пеҥгыдемдыме да каныме верыште тул ылыжмашым палемдыме огыл. Да каныме тӧнежым санэпедистанцийын мучашмутшо (заключенийже) деч посна пашам тӱҥалме огыл. Эпидемиолог-влакын тергымашым эртарымышт почеш, штрафым пуэныт. Штраф кугыт 8 300 теҥгеш шуын. Тыге «Яльчик» каныме вер йоча-влак дене 20 июньышто вашлиеш, а «Чародейка» - 26 июньышто.

«Школ йӱк лач шарнымаште гына кодеш». Тений 6100 ӱдыр-рвезе школым тунем пытарен. Ынде нунын куанле пайремышт, школ дене чеверласыме касышт вуча. Туныктыш виктемын палдарымыж почеш, тений тиде кече 20, 21 июньлан толеш. Палдарена, тиде кечын Йошкар-Оласе 8 школ 11-ше классым тунем пытарыше-влак дене чеверласа. А моло школ-влак тиде пайремым эртарашлан вес кечым ойыреныт. Кундемна мучко школ дене чеверласыме кас-влак 26 июнь марте эрташ тӱҥалыт.

«Пеледыш пайрем деч эстафетым Сабантуй налеш». Татар калыкын пайремже Йошкар-Олаште 21 июньышто эрташ тӱналеш. Мэрий пресс-службын палдарымыже почеш, тиде кечын татар-башкир кучедалмаш, армреслинг, кирым нӧлтымаш, тыгак тӱрлӧ модмаш вуча. Тыгак Марий Эл да Татарстан Республикын мурышо да куштышо коллективше-влак шке мастарлыкышт дене куандарат. Пайрем Йошкар-Олан 400 ий темме лӱмеш паркыште 11 шагатлан тӱҥалеш.
...