Июнь тылзе мом конден - МЧС иктешла. Эртыше тылзыште Марий Эл мучко 3 кугу туткар лиймым палемдыме. Тиде Морко, Килемар районышто пожар да Куженер районышто самолет камвочмо. А идалык тӱҥалтыш гыч ончаш гын, республик мучко 8 кугу тукар лийын. МЧС пашаен-влак ончык пурен каласат, июль тылзыште туткар лийме игече вашталтме да пӱртӱсын вийже деч шогаш тӱҥалеш. Тиде кӱдырчан йӱр годым мардеж талышнымаш да чодыраште тул ылыжмаш лийын кертеш. Кодшо ийлам таҥастараш гын, июль тылзыште кокла шот дене 35 -45 пожар лийын.

«Пашаш пурымо деч ончыч декларацийым возен ончо». Роструд пашам пуышо-влаклан «Паша декларацийым» возаш темла. Тиде сомылым шуктымаш кызыт шке кумылын гына шукталтеш, но жап эртыме семын тудо обязательный лийын кертеш. Декларацийым возымо годым 17 пунктан анкетым серыман. Тушто палемдат ойпидышым кагазеш пеҥгыдемдыме мо, пашадарым жапыштыже тӱлат мо, отчислений ышталтеш мо, пашам аралымылан тӱткылыкым ойырат але уке. Возымым тергымек, предприятий вуйлатышылан «ӱшан сертификатым» кучыктат. Тыгай документым налше вуйлатыше ончыкыжым паша права шотышто кеч-могай йодыш почеш яра консультацийым налын кертеш.

Йоча пособий кугыт пашадар вашталтме деч шеҥгелан огеш код. 1 июль гыч йоча пособий 10 тичмаш 5 луымшо процентлан кӱзышаш. Тыгак йоча шочмо дене кылдалтше полыш окса кугыт вашталтшаш. Тиде икшыве шочмо годым ик гана полыш окса, тыгак йочан идалыкат пеле жап марте пуымо полыш окса кугыт. Мӱшкыран ӱдырамаш-влаклан жапыштыже учетыш шогалмылан ик гана пуымо полышат шукырак лиеш. Ты марте йоча шочмылан 8 тӱжем теҥгем, а ик ият куд тылзаш марте йочам ончымылан пашадар дечын 40%-шым тӱленыт. Тыгак 1 июль гыч инвалид йочам ончымылан компенсаций вашталтеш. Пособий кугыт 500 тенге гыч 1200 теҥге марте лиеш.
...