Шинчымашым налмек, шочмо кундемыш пӧртылыт. Целевой направлений дене медицин тунемме тӧнежлашке тунемаш пурышо-влакын списокышт ямде. Тений Российысе 5 тунемме тӧнежышке 156 абитуриент тунемаш пура. Кодшо ийласе показатель дене таҥастараш гын, тений шагалрак улеш. Мутлан, 2005 ийыште 407 абитурент документым пуэн гын, а 2008 ийыште 262 гына. Палемдыме абитуриент-влак кокла гыч 45-же медаль да йошкар диплом дене лийыныт, тышечын 36-жо шинчымашыштым пеҥгыдемденыт да тунемаш пуреныт. Каласаш кӱлеш, тунемаш пурен кертше-влак кокла гыч 86 процентше район гыч улыт, а молыжо ола гыч. Палемдыман, шинчымашым сайын ончыктеныт Коркатово кыдалаш школ тунемше-влак тыгак Ургакш, Руэм, политехник лицей да 18 номеран тунемме тӧнежын ӱдыр-рвезе-влакышт.

Марий Элыште 4 тӱжем гектар наре чодырам шындышаш улыт. Россий мучко Киотский вашкелшык (соглашений) дене келшен чодырам шындат. Тудо 2004 ий ноябрь тылзыште вийым налын. А федерал программе семын 2008-2012 ий марте шукталташ тӱҥалеш. Шанче пашаеҥ-влак палемдат, южышто углеводород шуко улеш, кудыжо пӱртӱслан эҥгекым конда. Кызыт тӱнямбалсе тӱшкер (сообщество) ончылно тӱҥ паша шога. 2012 ийлан тӱрлӧ газ-влакын уровеньжым 1990 ий марте шукташ огыл. Тидын нерген Японийыште кугу восьмеркын саммитыштыжат каҥаштеныт. Каласаш кулеш, 7-8 ий гыч шындыме иман пушеҥге атылана гын, тунам тӱнямбалсе фонд гыч шийвундым ойрат. Палемдена, тений шошым 800 гектар наре чодырам Шернур кундемыште шындыме улеш. Тидын нерген Виктер сайт палдара.
...