Лӱчгече календарь

Идым тылзын кудымшо кечынже 1931-ше ийыште Шернур кундемыште туныктыш пашаеҥ Зоя Александровна Фёдорова шочын. Паша корныжо Мустай, Шернур да Лажъял школа дене кылдалтын. Зоя Александровна руш йылмым да литературым туныктен. 4 ий СССР кӱшыл погынын депутатше лийын. Марий республикысе школын сулло туныктышыжо.

Тиде кечынак 1945-ше ийыште Самара олаште администраций вуйлатыше Наталья Леонидовна Дементьева шочын. 10 ий Санкт-Петербургысо кугыжаныш историй тоштерын вуйлатышыжлан тыршыме деч вара Россий Федерацийын тӱвыра министрже лийын, а 1 ий гыч алмаштыше сомылым шукташ тӱҥалын. 2004-ше ий гыч Наталья Леонидовна Россий Федераций федерал погынышто Марий Эл кугыжаныш погын деч ӱшанъеҥ улеш. Россий Федерацийысе тӱвыран сулло пашаеҥже.

...

4 сентябрьыште Дмитрий Медведев спорт министр Виталий Мутко да Кугыжаныш каҥашын секретарьже Александр Абрамов дене паша вашлиймашым эртарен. Тыштак Пекин олаште эртыше кеҥежымсе Олимпиадым иктешленыт, 2012 ийыште Лондонышто эртаралтше таҥасымашлан ямдылалтме нерген йодышымат нӧлталыныт. Элыште спортым вияҥдыме шотышто темлымаш-влакым Россий президент ямдылаш кӱштен. Тиде йодышым кумданрак октябрь тылзыште каҥашышаш улыт. Вашлиймаш годым тыгак Виталий Мутко «Российыште 2006-2015 ийлаште спортым вияҥдыме» федерал программым шуктен толмо нерген палдарен.

«Финно-угор иза-шоляк-влак Йошкар-Олаште вашлиялтыт». Йошкар-Олаште 10-шо гыч 13 сентябрь марте 10-шо Тӱнямбал финно-угор писатель-влакын конгрессышт эрташ тӱҥалеш. Тенийсе конгрессын темыже: «Финно-угор литературын ончыкылыкшо. Самырык тукымын сылнымутшо». Конгрессыш Российын финно-угор регионлаж гыч да тыгак Финландий, Венгрий, Франций, Германий, Чехий, Эстоний, Литва, Латвий гыч литератур дек шӱман 150 еҥ толеш. Мероприятий организаторын, Марий Элысе Писатель-влак ушем да Финно-угор литератур тӱнямбал ассоциацийын палдарымыже почеш, торжественно почмаш 11 сентябрьыште Шкетан лӱмеш марий кугыжаныш драм театрыште лиеш.

...