Марий йӱла

Чодыра телым тып-тымык. Лач южгунам гына, йӱштӧ дене пудешталтше укш-влакын камвочмым колаш лиеш. Кенежым чодыра сӱан вате гай лиеш. Лым-лийде чӱчка. Ужар сывынже дене ну лоҥеш, ну лоҥеш. Шошым йоча гай пуйто юарлен модын кушталыштеш. Шыжым, идалык мучко погымо пӱртӱс саскаже деке калыкым ӱжеш. Кажне гана, ужар капкажым почын сай оза семын, унаже-влакын куанен вашлиеш. Лач унаже гына… ий гыч ийышке чонжо дене йӱштемаш тӱҥалын. Чодыра пуымо пӧлек ынде шагала чучеш, шукырак, да чаплыракым гына пу! Опкын койыш дене пӱртӱс порылыкым мондаш тӱҥалын. Оксалан ужалалтын, пушенгым шке илемым чоҥаш гына огыл, ужалаш руаш тӱҥалын. Кеч ик пушенгыжым, шке кидше дене шындем ыле. Шонем, оксан кулжо тиде нерген шукертак монден, але паленат огыл….

А тошто марий мурышто тыге муралтеш «Пич чодыра - мыйын ачам, ужар олык - мыйын авам, канде кава, волгенче йӧратыме йолташем-влак».
Кугезе кочана-кована-влак, пӱртӱсын вашталтмыж семын илен лекташ, тудлан келыштаралташ тунемыныт. Чодыраш пушенгым руаш толшо марий еҥ уло кӧргӧ чонжо дене тыгеракын пелештен: «Пӱртӱс-аваем, мыланем шочаш пӱренат гын, тыйын поянлыкет дене пайдаланашат мыланем эрыкым пу. Ешем кугемын, у пӧртым ынде чоҥыман. Тидланже икмыняр пушенгым сӧрвален йодам. Мый шуко ом нал, лач кӱлешлыкшым. Веле». Кугезына-влак умыленыт: пӱртӱс дечын чылажымат ситышым гына налман, опкын кумыл тудлан огеш келше. Садлан утыж дене, тӱргоч ыштылман огыл. Пӱртӱс поянлыкым палынак катыкемдет гын, тудо тылат эҥгекым конден кретеш.

...