Лӱмгече календарь

Идым тылзын коло кандашымше кечынже кутырен кертдыме да соҥгыра-влакын кечышт палемдалтеш.

Тыгак таче шке профессионал пайремыштым машина чоҥышо пашаеҥ-влак палемдат.

79 ий ончыч Курыкмарий кундем Кого Шапкила ялыште кумдан палыме балетмейстер Александр Акимович Чеботкин шочын. Козьмодемьянск оласе куштышо ансамбльын вуйлатышыжлан тыршыме годым, тудын коллективше Россий кӱкшытысӧ таҥасымаште лауреат лӱмым сулен. Умбакыже уста куштызым балетыш, а вара кугыжаныш ансамбльышкат ӱжыныт. 17 ий Александр Акимович «Эрвел» калык ансамбльын балетмейстерже лийын. А 1990-ше ий гыч Марий кугыжаныш педагогик институт пеленсе «Марий сем» фольклор ансамбльым вуйлаташ шогалын. «Марий калык куштымаш» да «Курыкмарий калык куштымаш» книга-влакын авторжо. Марий республикысе сымыктышын сулло пашаеҥже.

Кугу лӱмгечым таче Курымарий кундемынак вес лӱмлӧ балетмейстерже да тӱвыра пашаеҥ Тамара Викторовна Дмитриева палемда. 1991-ше ийыште тудо «Эрвел марий» ансамбльым чумырен да шкеак вуйлаташ шогалын, а 10 ий гыч калык усталык рӱдерын вуйлатышыже лийын. Ятыр пособийын да книган авторжо. Олык Ипай лӱмеш кугыжаныш премийын лауреатше. 2003-шо ийыште калык костюм фестивальым эртарымыжлан кугыжаныш премий дене палемдалтын. Марий Эл тӱвыран сулло пашаеҥже.

...