Кодшо кечылаште Уржум районысо Тӱм-Тӱм ял калык пеш оҥай мероприятийым эртарыш. Мероприятийым эртараш шуко вийым пыштен тиде ялын чолга рвезыже - Александр Федотович Петрушин. Чыным каласаш гын, тудо Уржум веллан вел огыл чолга рвезе, а пӱтынь марий аланлан чолга еҥ.

Тиде кечын кум вере шарнымаш кӱ обелискым почмо. Радам шот денат, вер шот денат паша рат пеш лач ышталтын. Мероприятий деч ончыч Александр Федотович архивласе документ-влак дене палыме лийын. Верысе калыкым тышке толашлан ямдылен, тысе школын тӱҥалтыш класслаште тунемшыже-влакымат кумылаҥден кертын. Садланак докан пӱтынь мероприятий тематически пеш мотор келыштарыме лие. Виче вӱд сереш шке верыштым муыч марий кид дене ыштыме историй дене кылдалтше кум тамга.

Эн ончыч шарнымаш обелискым ныл тӱжем ий ончыч илыше калык-влакын илыме верешышт шогалтыме. Тиде вереш ала чынжымак Тӱм-Тӱм яллан негызым пыштеныт? Ала чынжымак икмыняр марий мут эше тунамак, ныл тӱжем ий ончыч тиде верлаште ала кӧм ала куш ӱжын? Вот тиде верыште ала кӧлан ала мом куанен каласкален? Ала ик мыняр марий мут тиде вереш шочын да тунамсе жап гыч тачысе кече марте аралалт кодын?

...