Сӱан нерген огыл, а йоча шочмо нерген шонат кундемыште илыше-влак. Республикысе ЗАГС пӧлкаште пашам иктешленыт. Тыге, 2007 ий дене таҥастарымаште, ешым чумырышо-влак тӱжемлан шагалемыныт. Идалык мучко тӧртык дене келшен, 5360 у еш шочын. Тыгай сӱрет улмым ЗАГС пашаеҥ-влак високосный ий дене кылдалтын маныт. Тидын годымак палемдыман; ойырлышо ешат ни шукемын, ни шагалемын огыл. А теве йоча шочмо шукемеш. Тӱшка чот 8708 йочашке шуын. Тидыже 2007 ий дене таҥастарымаште 300 утла йочалан шукырак улеш.

Йоча-влакын каникулышт шуйнен кертеш. 12 январьыште термометрын столбикше 25 градус деч ӱлнӧ ончыкташ тӱҥалеш гын, школлаште 1 гыч 4 класс марте тунемме занятийым чарат. Тылеч посна кундемыштына 30 градус марте йӱкшемда гын, 1 гыч 9 классыште тунемше-влак школышко огыт кай. А 10-11 классыште тунемше-влакын занятийыштым 32 градус йуштӧ годым гына чарен кертыт. Но кеч-могай игечыштат школ-влак пашам ышташ тӱҥалыт. Тиде йоча-влакын шке кумылын тунемме але консультатцийыш мийыме дене кылдалтеш. Увер дене туныктыш министерстве паладара.

...

«Марий Эл ТВ» эфирыштыже лекше «Теме ден комментарий» программе гыч:

1. Тений У ийым лу кечаш каныш дене тӱҥална. Тазалыкаралтыш министерствыште палемдат: Российыште илыше калыклан тыгай каныш пайдам веле конда. Теве мо шотышто: кужу каныш годым пашаче калык кана, жапым еш дене пырля эртара. Вара сай кумыл дене пашам тӱҥалеш да январь тылзын кодшо кечылаштыже кугу лектышым ончыкта.

А Кугыжаныш Думын депутатше-влакын мутышт почеш, кужу каныш демографий сӱретымат саемдаш полша. Тудын лектышыжым ме сентябрь тылзыште пален налына.

2. Милиций пашаеҥ-влак шӱльым ямдылат да имне дене кудалышташ тунемыт. Тений Йошкар-Ола уремлашке имнешке-влак патруль дене лектыт. Тидлан кызыт Руэмысе ипподромышто чылаже 4 имне уло. Нуным пошкудо Татарстан гыч конденыт. МВД пашаеҥ-влакын мутышт почеш, мемнан олалан 8-9 имнешке милиционер кӱлеш.

Патруль дене кудалыштше имне деке йодмаш кугу лиеш. Тудо чытыше, мутым колыштшо да писе лийшаш. Вет нунылан кеч-могай игечыштат пашам ышташ да олаште тӱрлӧ вере лияш логалеш. Имнешке-влак патруль дене вӱд воктеке, бульвар ден парклашке лектыт. Тыгак тӱрлӧ пайрем годым олаште порядкым эскераш полшат.

...