Январь тылзе тул азап ваштареш кучедалше-влаклан шокшын эртен. Эртыше арняште гына 18 тул азап лийын. Тиде годым 3 еҥ илыш дене чеверласен. Килемар кундем Евсейкино ялыште проводаште замыканий лиймылан кӧра газ баллон пудештын. Пӧрт йӱлен, тулышто оза колен. Ты амалланак кӧра тиде кундемыште эше ик сурт оралтыжге йӱлен. Пошкудо-влакын полшымышт дене 2 икшывым да пӧръеҥым утарен коденыт. Тул азаплан кӧра кундемна мучко эҥек 276 тӱжем теҥгешке шуын.

«Телефон террорист-влак» идалыкым миным пыштыме дене тӱналыныт. 23 январьыште кастене МВД дежурныйын пультышкыжо шолып йыҥгыр пурен. Пуйто Йошкар-Оласе кум банкышке бомбым пыштыме. ОМОН специалист-влаклан банкым тереген лекташлан 2 шагат наре жап кӱлын. Пурышо увер шоя лийын. Ведомство пресс-службын палдарымыже почеш йыҥгыртыше 40-45 ияш пӧръеҥ лийын. Тудо уремысе телефон будко гыч йыҥгыртен. Тачысе кечылан йынгыртышым кычалыт. «Террористым» 3 ийлан эрык деч посна коден кертыт але штрафым тӱлаш пуат.

...

2010 ий гыч автомашина-влаклан техосмотрым у семын эртараш тӱҥалыт. Тидын нерген Российысе кугыжаныш автоинспекций палдара. Машина-влакым, ГИБДД-ште аккредитацийым эртыше частный фирма-влак тергаш тӱҥалыт. Техосмотр пунктлан ик тӱҥ йодмаш лиеш. Тудо автомашина-влакым ачалышаш огыл, палдара корно лӱдыкшыдымылык шотышто тӱҥ инспектор Виктор Кирьянов.

Эше ик у пуртымаш - машинам вӱдаш правам налмаш. У программа дене келшышын, машинам вӱдаш практик туныктымаш-влак ончыч 32 шагат лийыныт гын, у ий гыч 50 шагат лиеш. Тыгак у предмет уло «корнылаште машинам вӱдышын психофизиологийже». Машинам вӱдышӧ-влакым вашке полышым пуаш туныкташ тӱҥалыт. Правалан тунемаш у правилым пуртымо дене, автошкола-влак акымат кугемдат, тидыжым бензин утларак кӱлмӧ дене умылтарат. ГАИ-ште экзаменым кучымо годымат вашталташ лиеш, ончысо 3 фигура олмеш 12-ым шуктыман. Экзаменым видеокамера эскераш тӱҥалеш. Оценкымат машин шында, машинам вӱдымым ныл видокамера воза. Кокыт уремыште, кокыт машина кӧргыштӧ. Тыгай ВАЗ 2105 автомашинам республикышке конденыт, кызыт тудылан документым ямдылат.

...