Эр
Пундашдыме канде кава
Ужатыш ший тылзым умбак.
Чевер оҥан ош пыл шава
Куаным Пӱнчер ял ӱмбак.
Тора гыч, чылам чонаҥден,
Тӱням саламла ӱжара.
Эр кече тойлалме чаҥ ден
Пиалым пашаште сӧра.
Тарваныш лыжга лай мардеж:
У ныжыл сем лекте шыман.
Да Тӧргым вӱд тыйын лӱмеш,
Чӱчкалын, тавалтыш чолган.
Кас
Тӱрлен мотор тӱрым
Кундем урвалтеш,
Заҥгар кава тӱрыш
Кас кече иеш:
Шарен шулдырлажым
Ӱда ший йолвам,
Йочан кок шинчажым
Урга омылан.
Юрий Чавайным шарнен
Тый от тол тетла мемнан кундемыш,
Ял воктене от уж садымат.
Эх, мемнан-влак, сай айдемым
Родылак шарнат да сагынат.
Толынат тора гыч Коклалоҥгыш.
Койышет келшен гын я чонет,
Калык, жапын лончым тутыш лоҥгын,
Вашлийнеже угыч тый денет.
Южо ямде, лектын Тӧргым серыш,
Пушыш шинчын, толкын вач ияш.
Южо Сарманай ӱмбалне эрым
Ямде тул воктене вашлияш…
Тый гает чылт ер воктене ото:
Шӱлыкан, йомартле, кумылзо;
Кундемем ӱмбалне тыйын сото,
Морко вел пӱртӱсын мурызо.
Тый от тол тетла мемнан кундемыш,
Ял воктене от уж садымат.
А мемнан-влак поро, сай айдемым
Родылак шарнат да сагынат.
