(15.01.2007 – Марий Эл Радион архивже гыч)Танака Такасим Марий Элыште сайын палат. Тудо ынде 12-шо гана тышке корным такырта. А тӱҥалынже 1992-шо ийыште, англичан да руш йылмым сайын палыше япон рвезе марий йылмым тунемаш кумылаҥын. Ик ий наре Марий кугыжаныш университетыште йылме пракикым эртен. Икмыше туныктышыжо Ольга Терентьевна лийын. Самырык еҥ тунамак Марий Элым тореш-кутынь коштын савырнен, Куженер ден Параньга районлашке веле шуын огыл. Тудо марий тӱвыра, сымыктыш, калык йӱла деке лишке палыме лийын. Кызыт Такаси марий йылмысе глаголын эртыше формыжо тема дене докторлык диссертацийым воза. Тений тудо шушаш кум ийлан грантым сеҥен налын, тидыже шымлымаш пашам мучашлаш сай йӧным ышта.
Палемдыман, Японийыште 10 томан «Тӱҥ калык-влак» серий савыкталтеш. Иктыштыже самырык шынчыеҥ марий калыкын историйже да тӱвыраже нерген кугу статьям савыктен. Ты гана Такаси Марий Элыште 10 кече наре шымлымаш пашажлан материалым погаш тӱҥалеш.
А 12 январьыште 18.00 шагат гыч 19.00 шагат марте Танака Такаси Марий Эл Радион редакторжо Наташа Пушкина дене вияш эфирыште мутланен. Вашлиймаште Марий кугыжаныш университетын марий йылме кафедрын вуйлатышыже, филологий шанче кандидат, доцент Валерий Николаевич Максимов лийын. Вияш эфир гыч 1 ужаш (mp3)
Вияш эфир гыч 2 ужаш (mp3)
Вияш эфир гыч 3 ужаш (mp3)