Россий президент Дмитрий Медведев 7-ше Россий кӱкшытысӧ спорт модмашке толын огеш керт. Тидын нерген Марий Эл республикын информацийым пуышо виктем палдара. Тидыже Японий олаште «Кугу восьмеркын» саммитше эртыме дене кылдалтеш. Но туге гынат, таҥасымаш почмашке VIP-еҥ-влак ятырын толшаш улыт. Мутлан, тиде кечын Марий Элышке Россий президентын ӱшанеҥже Юл кундем федерал округын вуйлатышыже Григорий Рапот, капкультур да спорт федерал агенствын вуйлатышыже Вячеслав Фетисов, тыгак Спорт модмашын оргкомитет вуйлатыше, Россий ял озанлык министр Алексей Гордеев толшаш улыт. Ушештарена, 7-ше Россий кӱкшытысӧ кеҥежымсе спорт модмашым 8 июльышто «Дружба» стадионышто почыт. Тачысе кечылан спорт модмашке Российын 75 регион йодмашым пенгыдемденыт. Тыгак Украина да Таджикистан гыч команде-влак лийыт. Историйым шергалаш гын, эн шуко участник дене спорт ӱчашымаш Ижевскыште лийын. Тушто 2400 еҥ погынен. А Россий кӱкшытысӧ модмаш Волгоград кундемыште 1995 ийыште эртен да 48 регион гыч командым чумырен.
Сӱрем тылзын 3 кечынже ГИБДД пашаеҥ-влакын кечышт палемдалтеш. Тидын дене кылдалтын корнысо лӱдыкшыдымылыкым эскерыше инспекций пашаеҥ-влаклан 12 у машинам пӧлекленыт. Ынде МВД, УВД, ГАИ пашаеҥ-влакын автопаркыштышт УАЗ «Hunter», «ВАЗ-2115» да «ГАЗ-3110» машина-влак дене пойдаралтын. Машина-влак деч ключым эл кӧргӧ паша министр сомылым шуктышо Владимир Тарасов «Строитель» стадионышто пуэн.
Марий Эл Кугыжаныш погынын пашаже Россий кӱкшытыштӧ эртен. Россий Федерацийын субъект-влак коклаште тӧртыкшот (законодательство) дене докладым ыштыме конкурс эртен. Тыште мемнан кундемысе кугыжаныш погын лауреат лӱм ден палемдалтын. Дипломым кугу квалификациян пашам шуктымылан да пашаште у йӧным кучылтмым кычалмылан пуэныт.
«Почтальон-влак пайремлан ямдылалтыт». Тыглай кечын нуным ял гыч ялыш, сурт гыч суртыш кугу сумка дене ужына гын, а теве 13 июльышто почтальон-влакым канде-нарынчалге вургем дене пален налаш лиеш. Тиде кечын почто пашаеҥ-влакын профессионал пайремышт. Каласаш кӱлеш, тений кундемыштына 15 гана профессионал пайрем семын эртарат. Тиде кечын почто пашаеҥ-влак тошто корреспонденцийым петыраш, уэмдыме почто пӧлка-влакым почаш шонат. Тыгак ветеран-влаклан таумут ыштымаш, «2008 ийын эн тале почтальонжо» конкурсым иктешлымаш лиеш. Тыгак, «Россий почто» пресс-службын палдарымыже почеш, тунемше-влаклан почто пӧлкалаште экскурсийым эртараш тӱҥалыт. А теве Мари-Турек район Тат-Китня почтамтыште уэмдыме клиент пӧлемым почыт.
Лишыл жапыште кундемыштына дельфинарийым почшаш улыт. Дельфин-влаклан Йошкар-Олаште Сомбатхейыште лӱмынак верым келыштареныт.. Лачак тушкыжо 1 июльышто Йошкар-Оласе пожарный машина дене 6 шагат наре вудым шупшыктеныт. Палемдыман, дельфин лач теҥыз вӱдыштӧ ила. А кузе Арбан вӱдым теҥызлан келыштараш тӱҥалыт, тидыжым дельфин-рӱдер гыч специалист-влак икмыняр жап гыч умылтарышаш улыт.
Аня Левагина
Увер йогын (mp3)
Архив новостей
Популярные новости