Эртыше арням иктешлен

1 июльышто ял озанлык министр Александр Егошин кундемысе муниципал кундем вуйлатыше, ял озанлык виктем вуйлатыше да тыгак тиде йодыш дене чак кылдалтше предприятий вуйлатыше-влак дене каҥашпогыным эртарен. Семинар паша кышкар почеш кӱкшӧ качестван кугым ямдылыме, пасушто ӱдымӧ кушкылым аралыме йодышым нӧлталыныт. Тыгак уржа-сола жаплан техникым ямдылыме пашам лончыленыт. Семинарыш толшо-влак Медведево районысо «Тепличное» ял озанлык предприятийышке миеныт. Тушто нунылан сенажым ямдылыме технологийым ончыктеныт да кургым ямдылыше техникын пашаж дене тӱрысынек палдареныт.

Марий Эл Кугыжаныш погынын пашаже Россий кӱкшытыштӧ эртен. Россий Федерацийын субъект-влак коклаште тӧртыкшот (законодательство) дене докладым ыштыме конкурс эртен. Тыште мемнан кундемысе кугыжаныш погын лауреат лӱм ден палемдалтын. Дипломым кугу квалификациян пашам шуктымылан да пашаште у йӧным кучылтмым кычалмылан пуэныт.

«Йыҥыртет - вашмутым муат». 1 июль гыч Марий Эл республик виктерын «шокшо линий» телефонжо пашам ышташ тӱҥалын. Илышкыл, пӧрт ачалымаш, кундемым тӱзатыме, санитар да моло лекше йодыш дене 64-15-28 телефон дене йыҥгырташ лиеш. Тыге кундемыште илыше-влак тургыжландарыше йодышлан вашмутым налын кертыт. Пурышо серыш, йодмаш да йыҥгыр йодыш-влакым лончылашлан министерствышке, ведомствылашке да тыгак предприятий вуйлатыше-влак деке серышым колташ тӱҥалыт.

Сӱрем тылзын 3 кечынже ГИБДД пашаеҥ-влакын кечышт палемдалтын. Тидын дене кылдалтын корнысо лӱдыкшыдымылыкым эскерыше инспекций пашаеҥ-влаклан 12 у машинам пӧлекленыт. Ынде МВД, УВД, ГАИ пашаеҥ-влакын автопаркыштышт УАЗ «Hunter», «ВАЗ-2115» да «ГАЗ-3110» машина-влак дене пойдаралтын. Машина-влак деч ключым эл кӧргӧ паша министр сомылым шуктышо Владимир Тарасов «Строитель» стадионышто пуэн.

«Иномарке машинам Йошкар-Олаштат налаш лиеш». 3 июльышто «ТрансТехСервис» холдингын пресс-конференцийже эртен. Тыште нуно журналист-влаклан компаний нерген палдареныт. Да палемден коденыт, ондак тыгай машинам Озаҥ олаште налаш лийын гын, кызыт тыгай ак денак иномарке-влакым Йошкар-Олаште налаш лиеш. Палдарена, «ТрансТехСервис» холдинг – Юл кундемыште автомашинам ужалыше эн кугу компанийлан шотлалтеш. Тудо 21 автомобиль маркын диллерже улеш.

Кӱшыл шинчымашым пуышто тунемме тӧнеж кумда корныш ӱдыр-рвезе-влакым ужатен. Тений Марий кугыжаныш университетым 2300 утла ӱдыр-рвезе-влак тунем пытареныт. Эн шуко выпускникым, 348 еҥым, экономический факультет кугу корныш луктын. Каласаш кӱлеш, ончычсо Н.К.Крупская лӱмеш Марий педагогик институтын 5-ше курсым тунем пытарыше-влак тений МарГУн дипломжым налыныт. Тыгай дипломым чылажге 665 выпускник кидышкышт кученыт.

«Парымыш пурет – каныш деч посна кодат!» Кеҥеж канышышыш кайыше-влакым суд пристав пашаеҥ-влак чот тергат. Нуно канаш кайыше еҥын парымже уло але уке ончат. Кодшо кечылаште тыгай спискышке 80 еҥ лӱмжым палемдыме лийын. Мутлан, арня кыдалне Йошкар-Олаште илыше канаш кайымыж годым суд пристав 158 тӱжем парымжым палемден. Тидлан кӧра тудо йот элыш каяшлан паспортым налын кертын огыл. Коммандировкым варалан кодаш огыл манын, тудо эрлашыжымак оксам тӱлен. Ушештарена, тӧртык (закон) дене келшен, гражданин-влак элым коден каен огыт керт. Кунам нунылан суд шуктышо сӧрыкым (исполнительный обязательствым) пеҥгыдемден.

Спорт увер. Футбол гына огыл, регбиат кундемыште озалана. Кодшо арняштеЙошкар-Олаште регби дене Россий кӱкшытысӧ ӱчашымаш эртен. Тушто 14 ий марте ӱдыр-рвезе-влак шке вийыштым тергат. Семеновко стадионышто чылажге 10 команде таҥасеныт. Тиде Сибирь, Таганрог, Краснодар кундем гыч команде-влак лийыныт.

Аня Левагина

Увер йогын (mp3)