«Шӧр йӧндартышым ончык колтыман». 2008-2012 ий жаплан кугыжаныш шӧрым пуышо вольыкым ашнаш программым пеҥгыдемден. Тиде программе дене келшен, 1 октябрь марте вольыкым ашнашлан келыштарыме комплексым, ферма-влакым чоҥен, уэмден шуктышаш, у обрудований-влакым келыштаршаш улыт. Тыгак вольык вуйымат шукемдаш шонат. А теве 1 сентябрь марте шӧр продукцийлан техник регламентым шуктымо шотышто кышкарым ыштен шуктыман. Кугу тӱткытым кукшо шӧрым кучылтмылан ойраш палемдат. Тидын годым ӧрдыж да Российын кундем гыч кондымым чараш маныт. Лишыл жапыште «Йоча-влаклан – шӧр» программым илышыш пуртат. Тидын дене келшен, йоча садыш да школлаш коштшо йоча-влаклан ик кечылан 200 грамм шӧрым пуаш палемдалтеш. Тидын нерген Виктер сайт увертара.

«Тошто пачерым улан алмаштат». Кугыжаныш программе дене келшен, шӱкшӧ да аварий лийме лӱдыкшӧ пӧртла гыч 83 ешым вес вере илаш кусараш тӱҥалыт. Тиде Йошкар-Ола, Волжск, Козьмодемьянск олаште да тыгак Звенигово, Килемар, Медведево да Шернур районлаште илыше-влак лийыт. Ты программым шукташлан федерал, республикысе да муниципал бюджет гыч 78 миллион теҥге ойыралтеш. Ушештарена, илымвер фонд программе 2012 ий марте шуйнаш тӱҥалеш. Да ты пашам шуктымын акше 5 миллиард теҥгеш шуэш.

«Парымыш пурет – каныш деч посна кодат!» Кеҥеж канышышыш кайыше-влакым суд пристав пашаеҥ-влак чот тергат. Нуно канаш кайыше еҥын парымже уло але уке ончат. Тачысе кечылан тыгай спискышке 80 еҥ логалын. Кеҥеж пагыт мучашлан тиде чот иземшаш. Тыге палемдат специалист-влак. Мутлан, тиде кечылаште Йошкар-Олаште илыше канаш кайымыж годым суд пристав 158 тӱжем парымжым палемден. Тидлан кӧра тудо йот элыш каяшлан паспортым налын кертын огыл. Коммандировкым варалан кодаш огыл манын, тудо эрлашыжымак оксам тӱлен. Ушештарена, тӧртык (закон) дене келшен, гражданин-влак элым коден каен огыт керт. Кунам нунылан суд шуктышо сӧрыкым (исполнительный обязательствым) пеҥгыдемден.
...