Р.К.Ялаева

Мишкан районышто 53 школ гыч 41-ште марий йылмым тунемыт. 31 туныктышо пашам тыршен ыштат. Кок «Башкортостан Республикын сулло туныктышыжо», 4 «Отличник» лӱмым нумалыт, 8 – кӱшыл, 13 – икымше категориян улыт. Мемнан администраций вуйлатыше В.М.Андреев, туныктыш пӧлка вуйлатыше пашаштына эре мелын шогат. Шийвундо, транспорт дене проблемым решатлат. Книга ден Марий Эл туныктыш министерстват, туныктыш институтат, Морко туныктыш пӧлкат, спонсорна-влакат полшен шогат.

Моло районысо школ-влак семын чыла уым налын, йоча-влаклан сай шинчымашым пуаш тыршена. Районышто да республикыште Яндыганова Л.Ш., Минаева Н.П., Мустакимова К.Ш., Абукаева В.А., Русиева Л.А., Янситова Н.И., Ибаева А.С., Васина И.Г., Александрова З.И., Ашиева Л.В., Алексеева Г.В., Ямурзина Н.А., Яшмурзина И.А. лӱмышт кумдан палыме улыт. Нунын тунемшышт сылнымут аланыште, республикысе олимпиадыште, конкурсышто сеҥышыш лектыт, мемнан Башкортостан Республикынам регионгокласе олимпиадыште кӱлеш семын ончыктат. Туге гынат, пашаштына ситыдымаш да проблеме-влакнат шуко.

Мемнан Башкортостан Республикыште, Мишкан районышто марий йылмым тунеммылан тӱрлӧ пагытыштат ни партий, ни правительство чаракым шынден огыл. Каласаш кӱлеш, тачысе кечылан тунемше-влакын чотышт шагалемеш, но марий йылме тунемше процент шот дене ок изем. Райцентрысе икымше да кокымшо кыдалаш, Ленинскысе школ тунемше-влак моло школлаш ушнен, ынде 10 ий шочмо марий йылмым тунемыт. Чаманаш логалеш, виян тунемше йоча-влак тӱҥалтыш класс гычак марий йылме олмеш йот йылме, информатика, риторика, шахматым ойырен налыт, а начар тунемше-влак – шочмо йылмым. Садлан отат пале – йоча-влакын шукым да келгын палымыштлан куанаш але шочмо йылмым палыдымыштлан ойгыраш. Пытартыш 2-3 ийлаште демократийын шоҥжо ӱмбалан эше ик проблеме толын лекте. Ынде южо школ ожсо семын тӱшка туныктыш планын национальный «Б» вариантшым огыл, а базисный «А» вариантшым ойырен налаш тырша, а тушто марий йылме ден литературлан 3 шагат веле пуалтын.

...