Ялозанлык пашаеҥ-влак шошо агалан ямдылалтыт. Тений Марий Элыште ӱдышаш кумдык 191 тӱжем гектар. Пареҥгым 2 тӱжем гектарыште, пакчасаскам 3 тӱжем утла гектарыште шындаш палемдыме. 15 апрель марте чыла техник пасуш лекташ ямде лийшаш. Шошо агам да шурно лектышым поген налме пашалан, вольыкым ончымо комплекслан, фермер да шке озанлыкым кучышо-влаклан полышым банк-влак пуаш ямде улыт. Мутлан, кодшо ийыште Курык Марий кундемыште кредит йӧн полшымо дене озанлык да фермер-шамыч 160 тӱрлӧ у техникым налыныт. Мари-Турек да Параньга районышто фермер-влак озанлыкышым вияҥден колташ кредитым кумылынак налыт.

Корно лӱдыкшыдымылыкым эскерымаште Республик Виктерын полышыжо утларак шижалташ тӱҥалеш. Марий Элыште автошкол-влаклан тӱткылыкым ойырат. Лач тидын нерген республик кӱкшытыштӧ профессионал туныктыш учреждений вуйлатыше да машинам виктараш туныктышо организаций-влак дене семинарыште каҥашеныт. Мемнан кундемыште экзаменым кучаш материал-техник базым кумдаҥдаш да саемдаш шонат. Тыгак машинам аварий деч посна, сайын вӱдышӧ-влакым ямдылыше школ-влакым радамлаш палемдыме.
Марий Элыште машинам вӱдаш 41 автошкол туныкта. Кодшо ийын автомашинам вӱдаш правам 13 тӱжем еҥ налын. Тидын годым пелыж наре курсант-влак экзаменым икымше гана кучен кертын огытыл.

...

Лӱмгече календарь

1954-ше ийыште Морко посёлкышто пашаче Михаил Аркадьевич Зайцев шочын. 35 ий тудо МарБумКомбинатыште тыршен. Совет Ушем кӱшыл погынын депутатшат лийын. Пашажым аклен, тудым 3-шо степенян Паша Чап орден дене палемденыт.

53 ий ончыч инженер-технолог Вениамин Витальевич Кельдыбай шочын. Шкеже тудо Советский район гыч. 31 ий ончыч «Кристалл» ушемыште пашам ышташ тӱҥалын, а 1993-шо ий гыч ты ушемынак пӧлка вуйлатышыже. Электронасос агрегат-влакым ыштымаште тудынат кугу надырже уло. Марий Эл кугыжаныш премийын лауреатше.

...

Лӱмгече календарь

Артамонов Юрий Михайлович – кумдан палыме марий писатель. Тудо Медведево районысо Ятман ялыште 1938-ше ий 6 апрельыште шочын. Паша корныжо тӱҥалтыш школышто тӱҥалын, шочмо йылмым да литературым туныктен. «Марий коммуна» газет да «Ончыко» журнал редакцийлаште тыршен. Икымше книгаже – «Совет салтак» - кӱчык ойлымаш-влак сборник. Шке ойлымаш ден повестьлаште писатель марий ял, озанлык паша, шочмо мланде, калыкше нерген серен. «Кузе илет пошкудем?», «Шӱдыр ер», «Изи Вичу». «Перкан лийже» да тулеч моло. Тудын возымыжым казах, мордва, удмурт йылмылашке кусарыме. Шкежат моло калык йылме гыч ятыр произведенийым марлаҥден. Юрий Артамонов - Марий комсомолын Олык Ипай лӱмеш премийын лауреатше.

Лач тиде кечын 86 ий ончыч сӱретче да сымыктыш пашаеҥ Зосим Фёдорович Лаврентьев шочын. Шкеже Курыкмарий район гыч. 10 ий тудо «Пачемыш» журналын художественный редакторжо лийын. Умбакыже шке семынже пашам ышташ тӱҥалын. 1964-ше ийыште Совет Ушемын сӱретче – влак ушемын членже лийын. Ончерже-влак Российысе тӱрлӧ олалаште да йот эллаштат эртеныт. Марий Эл Республикысе сымыкытышын сулло пашаеҥже. Россий Федерацийын сулло сӱретчыже.

...