Кӧлан кызыт 14-25 ий, лу ий гыч нуно 24-35 ияш лийыт. Тиде пагытыште самырык айдемын илышыштыже шуко мо вашталтеш. Таче кечылан кӧ школыш коштеш, тудо кузе ИКЭ-м кучен сайын тунем пытарме, сай кӱшыл тунемме верыш пурмо нерген шона. Кӧ кӱшыл тунемме верыште шинчымашым пога, тудо КТВ деч вара сай паша верым муаш шона. Кӧн кӱшыл шинчымаш нерген диплом кӱсеныште, тудо пашавер нерген, ешым погымо нерген шона. Адак рвезе-влакым армий вуча… Икманаш лу ий жапыште илыш вашталтеш.Лу ий жапыште марий илыш кузе вашталт толеш? Шочмо йылмына, тӱвырана могай кӱкшытышто лиеш? Тидын нерген шуко еҥ шона мо? Але марий самырыклан шочмо калык нерген шонаш жапше уке?! Шона гын, мом шона? Кузе марий тӱснам арален кодаш, вияҥден кондаш?
Кызыт шукынжо школым тунем пытарымек, олаш тунемаш, пашам ышташ толыт. Олалаште илен, садак шке марий койышыштым ончыктат. Йошкар-Олаште, Москошто, Питерыште, Пӱрӧ олаште, Озаҥыште, Екатеринбургыште марий дискотеке-влак эртат. Самырык-влак ийлан ик гана Марий Элыш марий самырыктукым слётыш погынат. Икмыняр чолгаже вургемыш, машинаш марий тӱсым пурташ тырша.
Но тиде садак пеш шагал, ок сите! Марий йылме чыла вере лийшаш. Но кызыт, чаманен каласыман, тиде тыге огыл. Посна ӧпкӧ мутым Марий Элысе марий-влаклан каласыме шуэш. Те тӱп республикыште иледа. Тендан правадам республикын Конституцийже, йылме шотышто тӧртык да монь аралат. Туге гынат, те тиде йӧным огыда кучылт. Кугыжаныш дене иктӧр ойласаш тунемман. Виян юристда шагал огыл. Адакшым кызыт самырык-влак шкешт пеш тале улыт. Марий тиякшат (чиновникшат) пеш шып шинчат, марий толкын толкынла шкенжым ок ончыкто, «изикорем» гай веле…
Шке шонымашдам серыза, йолташ-влак! Вучен кодам.
Василий Илибаев