Лӱмгече календарь

Пургыж тылзын коло кудымшо кечынже юрист, шанче да туныктыш пашаеҥ Валерий Иосифович Романов шочын. Шкеже Курыкмарий район гыч. Юстиций министрлан 15 ий тыршыме деч вара, шанче паша корныш тошкалын. 2001-2005-ше ийлаште тудо Марий Кугыжаныш университетын Россий да йот элласе частный права кафедрын вуйлатышыже лийын. 100 наре шанче пашан авторжо. Россий Федерацийын сулло юристше.

Йошкар-Олаште шочын-кушшо сӱретче Владимир Демидович Курочкинлан – 54 ий. Тудо шке пашаже-влак гоч марий калыкын историйжым, пӱртӱсын моторлыкшым ончыктен. Ончерже-влак Российын тӱрлӧ олалаштыже эртеныт. Кызытат Сӱретсымыктыш тоштерыште нуным ужаш лиеш. Владимир Демидович - Марий Элын сулло сымыктыш пашаеҥже.

71 ий ончыч тазалык аралтыш пашаеҥ Лелия Ивановна Соколова шочын. 1981-ше ий гыч республикысе йоча эмлымверын тӱҥ эмлызылан пашам ышташ тӱҥалын. Суапле пашажлан «Знак Почёта» орден дене палемдалтын. Йошкар-Олан почётан гражданинже. Россий Федерацийын сулло эмлызыже.

1954-ше ийыште Провой кундемыште уста пашаче Нина Гурьевна Григорьева шочын. «Марпромстрой» трестыште ятыр ий пашам ыштен. Пашажым аклен «Знак Почёта» орден да Совет Ушем кугыжаныш премий дене палемденыт.

Провой кундемыштак ты кечын кумдан палыме мурызо Эльвира Васильевна Краснова шочын. Тудын мурыжо-влак «Марий Эл Радиошто» чӱчкыдын йоҥгат: «Шочмо вер», «Аралыза авадам», «Шошо шӱмыштем». 1995-ше ий гыч Эльвира «Марий памаш» фольклор ансамбльыште мураш тӱҥалын. Кызыт шкетын мура.

Пургыж тылзын коло кудымшо кечынже Зоя, Светлана, Семён, Степан, Александр, Мирослав–влакын лӱм кечышт.

Матвеев Владимир