Лӱмгече календарь

Таче, пургыж тылзын коло шымше кечынже шанче да туныктыш пашаеҥ Николай Исанбаевич Исанбаев шочын. Шкеже Пошкырт кундем гыч. Ончыч педагогик институтышто, вара Марий шанче да шымыме институтышто пашам ыштен, а 13 ий ончыч Марий кугыжаныш университетын финн–угор йылме кафедрын профессоржо лийын. Диалектологий, лексикографий, морфологий да синтаксисым шымлымаште кугу специалистлан шотлалтеш. 100 наре шанче пашан авторжо. Марий Элын сулло шанче пашаеҥже.

Тиде кечынак 50 ияш лӱмгечыжым Куженер район Шой-Шӱдымарий ялыште туныктыш пашаеҥ да тренер Михаил Иванович Осипов палемда. 1981-ше ий гыч тудо Марий кугыжаныш педагогик институтышто физкультурым туныкта. Тунемшыже-влак кокла гыч ятырын Россий чемпионатлаште сеҥышыш лектыныт. Михаил Иванович Марий Элын сулло тренерже.

1951-ше ийыште ял озанлык специалист Дания Мухорлямовна Байрутдинова шочын. Шкеже Параньга район гыч. «Янга Тормыш» ушемыште тӱҥ зоотехниклан 1984-ше ий гыч тыршаш тӱҥалын. Тудын пашажым аклен, «Знак Почёта» орден да Россий Федерацийын сулло ял озанлык пашаеҥже лӱм дене палемденыт.

Торгайымаш пашаеҥ Николай Ильич Смышляевын шочмыжлан – 91 ий. Кугу Отечественный Сар корным эртен. Марпотребсоюзын вуйлатышыжлан 7 ий пашам ыштен. Ты годымак республикысе кӱшыл погынын депутатше лийын. «Йошкар Шӱдыр» да Йошкар Знамя Паша орден-влак дене палемдалтын.

72 ий ончыч Тошто Торъял селаште ял озанлык пашаеҥ Егор Васильевич Торощин шочын. «Прогресс» колхозышто 32 ий пашам ыштен. Тидым аклен, тудым Совет Ушем кугыжаныш премий дене палемденыт.

Пургыж тылзын коло шымше кечынже Аврамий, Вениамин, Исаак, Кирилл, Константин, Михаил, Фёдор, Анастасия, Гавриил–влакын лӱм кечышт.

Матвеев Владимир