Лӱмгече календарь

Ӱярня тылзын кумлымшо кечынже Йошкар-Олаште спортсмен Валерий Львович Ершов шочын. «Багги» кросс автомобиль дене Россий кӱкшытысӧ таҥасымаште сеҥыше радамышкат лектын. Тудо мыланна Совет Ушем спорт мастер, Россий Федерацийын чемпионжо семын палыме. 15 ий ончыч «Кросс-Авто» фирмым вуйлаташ шогалын. Марий Элысе автомотоспорт федерацийын вуйлатышыже.

53 ияш пайремым тӱвыра пашаеҥ Николай Николаевич Иванов палемда. Шочынжо тудо Курск олаште. Ынде ятыр ий тудо Марий кугыжаныш филармонийын йӱкрежиссёржылан пашам ышта. Марий Элын гына огыл, Россий Федерацийысе тӱвыран сулло пашаеҥже лӱмым нумалеш.

Журналист Александр Андреевич Лукаевлан – 53 ий. Юлсер кундемын эргыже шочмо районысо «Волжская правда» газет редакцийыште пашам ышта. 1995-ше ий гыч тудо тӱҥ редактор сомылым шуктен шога. Марий Элын сулло журналистше.

50 ияш лӱмгечыжым тазалык аралтыш пашаеҥ Александр Николаевич Принцев палемда. Паша корныжо республикысе йоча-влак эмлыме вер дене кылдалтын: тыште тудо шукертсек тӱҥ эмлызылан шога.

1954-ше ийыште Йошкар-Олаште шанче фольклорист Татьяна Аркадьевна Золотова шочын. Таче тудын кугу лӱмгечыже. Уло паша корныжо Марий кугыжаныш университетыште эртен. Тыште пашам ыштыме жапыште тудо ятыр фольклор книгам савыктен. Филологий шанче доктор. Марий Элысе шанчын сулло пашаеҥже.

Ӱярня тылзын кумлымшо кечынже Алексей да Макар-влакын лӱм кечышт.

Матвеев Владимир