Лӱмгече календарь

Ӱярня тылзын кумло икымше кечынже 1930-шо ийыште ял озанлык специалист Анна Степановна Полетаева шочын. Шкеже тудо Медведево район Цибикнур ял гыч. Ончыч «За комунизм» колхозышто, а вара «Семёновский» совхозышто пашам ыштен. Пашажым аклен, «Знак Почёта» орден дене палемденыт. Россий Федерацийын сулло агрономжо.

Тиде кечынак чекист Михаил Александрович Чулков шочын. Амур областьысе КГБ кучемыште оперативник гыч тӱҥалын пӧлка вуйлатыше марте шуын. 8 ий Абхазий республикын эл кӧргӧ паша министрже лийын. Умбакыже паша корныжо Москосо МВД институтышко конден. Ятыр чап танык да орден дене палемдалтын.

Ӱярня тылзын кумло икымше кечынже Кирилл да Трофим-влакын лӱм кечышт.

Матвеев Владимир