Лӱмгече календарь

Вӱдшор тылзын коло индешымше кечынже куштымаш кече палемдалтеш. Тиде кечын француз балетмейстер, хореографий сымыктышын теоретикше Жан Жорж Новер шочын. Тиде пайрем 1982-шо ий гыч палемдалтеш.

50 ияш лӱмгечыжым Параньга посёлкышто шочын-кушшо шанче-медик Ильдар Муназатович Ахметзянов палемда. Кӱшыл шинчымашым Горький оласе мединститутышто налын. Паша корныжо Санкт-Петербургысо шанче да шымлымаш институтышто тӱҥалын. 280 наре шанче пашан авторжо. Медицин шанче доктор, профессор. Кызыт Россий Федераций кугыжаныш службын советникше сомылым шуктен шога.

Кумдан палыме сӱретче да скульптор Анатолий Васильевич Медведев таче 64 ийым тема. Шочынжо тудо Саратов кундемысе Петровск олаште. Шукертак Йошкар-Олаш илаш куснен. Ятыр бюст да чапкӱн авторжо: Йошкар-Олаште марий классик С.Г.Чавайнлан чапкӱм лач тудын проектше почеш шындыме. Ончерже Россий элнан тӱрлӧ олалаштыже эртеныт. Олык Ипай лӱмеш премийын лауреатше. Марий Элын сулло сӱретчыже.

Кугыжаныш пашаеҥ Василий Кузьмич Бочкарёвлан – 60 ий. Студент пагытше Марий педагогик институтышто эртен: чодыра озанлык пашаеҥ специальностьым налмек, Пенза оласе ял озанлык кучемыш пашам ышташ каен. 1998-ше ийыште Василий Кузьмич Пенза областьын губернаторжо лийын. Но Марий Кугыжаныш техник университетыште тудым кызытат шарнат, а ик аудиторий тудын лӱмжым нумалеш.

Тале спортсмен Александр Феофанович Семёнов таче 46 ияш лӱмгечыжым палемда. Шкеже тудо Курыкмарий район Чекеево ял гыч. Ече дене коштмаште тиде спортсмен кугу кӱкшытыш шуын. Шукерте огыл курыкышто куржталмаш дене Спорт мастер лӱмым налын.

Вӱдшор тылзын коло индешымше кечынже Василиса, Галина, Ирина, Леонид, Богуслав, Пётр, Роберт–влакын лӱм кечышт.

Матвеев Владимир