Тиде кечылаште Пошкырт кундемыште «Мый марла ойлем» акций эрта. Марий эстрадын шӱдыржӧ Александр Речкин да «Марий Эл Радион» вӱдышыжӧ Санюн Вадик Бирск, Благовещенск, Янаул, Уфа, Нефтекамск олала, тыгак Мишкан да Калтасаште илыше марий-влакым Марий йылме дек кумылаҥдаш тӱҥалыт. Тыгай акций Пошкырт кундемыште Марий-влакын илыме верлаште шочмо йылмым тунемеш кумылаҥдаш, шочмо йылме деке пагалымашым шочыкташ эртаралтеш. Пошкырт кундемыште «Мый марла ойлем» акцийым эртараш шонымашым Башкортостан республикын Марий самырык ушемже, Марий Эл гыч «ВийАр» ушем, да Башкортостан республикын кучемже пуэныт.

Марий Эл Республикын Шернур районыштыжо «Они ковали Победу» книгам ямдылат. Тушкыжо Кугу Сар жапыште тылыште тырше-влакын лӱмыштым пуртат. Кӧн ача-аваже, родо-тукымжо Кугу ачамланде сар жапыште Шернур кундемыште илен да пашам ыштен, икманаш тылыште тыршен, ты книгашке нунын лӱмыштым пурташ манын, полшаш йодыт. Книгаш пуртымо радамыште тендан родо-тукымда уло але уке, рашемдаш шонеда гын, 70-40-10 номер дене йыҥгыртыза. 12 ноябрьыште Йошкар-Олаште 10 гыч 16 шагат марте Мер-политик рӱдерышке (Гагарин урем, 8 пӧрт) Ветарен-влак ушемышке толын эше ик гана родо-тукымдан лӱмжым книгашке пуртымо але уке шке терген кертыда.

10 ноябрьыште Марий самырык театрыште премьера. Тушто «Чодыраял Элександр» спектакльым модын ончыктат. Марий самырык театр ты спектакльым Марий Элын калык артистше Андрей Андрияновын 70 ийжылан пӧлекла. Андрей Андиянович ты спектакльыште тӱҥ рольым модаш тӱҥалеш. Спектакль - 91 ийым темыше коча нерген, кузе тудо илышлан куанен мошта. Чодыраялыште илыше Элександр дек чон налше толеш, да тудым вес тӱняшке наҥгаяш шона. Элександр илышлан куаныше, колымашым ондален, илышлан куанен илаш да ӱмыржым эшеат шуяш тырша. Тыгак ты спектальыште «Марий Эл Радион» самырык вӱдышыжӧ - Эрнест Александров модеш.

Марина Глушкова