29 январьыште "Саскавий" марий ӱдырамаш ушем черетан погынымашым эртара. Тудо кок ий жапыште ыштен шогымо пашам иктешлымашлан пӧлеклалтеш. Ушем вуйлатыше Г.С.Ширяева, у вуйверым сайлен, у паша планым пеҥгыдемдаш темла.
Паша погынымаш деч вара Марий ӱдырамаш-влак "Ош Юмын ӱдыржӧ-влак" книга да "Юмынӱдыр" календарь дене палыме лийыт. "Ош Юмын ӱдыржӧ-влак" книга ӱмаште Финляндийыште савыкталтын. Морко район Унчо кундемысе авана-кована-влак нерген шымлымаш книгам кумдан палыме этнограф Илдико Лехтинен ямдылен. Тиде паша нерген авторын Марий Элысе йолташыже, историй наука кандидат Т.Л.Молотова ойлаш тӱҥалеш.
А "Юмынӱдыр" календарь нерген ме ончычат возенна ыле. 2010 - 2011 ийлам авалтыше, "Юмынӱдыр" миф негызеш чоҥымо календарьым Сергей Михайловын чумырымо автор, модель-влак дене пырля ямдылыме. Кумда тӱняумылымашым авалтыше, тачысе самырык еҥым калык ойпого поянлык деке шӱмаҥыше календарь нерген проектын авторжо шке ойлаш тӱҥалеш.
Погынымаш Марий Эл тӱвыра, печать да калык-влакын пашашт шотышто министерствын конференц-залыштыже (Коммунистический урем, 34) 17 шагатлан тӱҥалеш.
Зоя Дудина
