IX Марий калык погын деч вара «Мер Каҥаш» вуйверын икымше погынымашыже лийын. Тудым Оньыжа Анатолий Николаевич Иванов вӱден. Погынымаште кум оналмаш: М.З.Васютин, Ю.П.Русанов, В.А.Мочаев да вуйверын кок еҥже: Э.В.Александров, Н.В.Пушкина лийыныт.

Вашлиймашыште кум тӱҥ йодышым лончыленыт. Вуйверын еҥже-влакын могай пашам вӱдаш тӱҥалмышт нерген радамленыт, паша планым ямдылыме шотышто ойленыт, тыгак Йошкар-Олаште Пеледыш пайремым эртарен колтымо йодышым каҥашеныт.

Кугу мероприятий ден пайрем-влакым ямдылымаште да эртарымаш йодышлан вуйверын еҥже Наталья Пушкина вуйын шогаш тӱҥалеш. Оналмаш Юрий Русановлан профессиональный тӱвыра да сымыктыш деке калык кузе шӱмаҥдыме нерген шоналтыман. Оналмаш Михаил Васютин кӱшыл кучем дене кылым ышташ полшышаш. Кумшо оналмаш Валерий Мочаев марий-влак тӱшкан илыме кундем-влак дене пашам умбакыжат ыштышаш. Мер Каҥашын лӱмжым нӧлталме амал дене газет, радио, телевидений да интернет-лаштыклаште ыштыме паша нерген утларак палдараш тӱҥалыт. Тидлан посна еҥ мутым кучаш тӱҥалеш. Оласе уремлаште да моло вереат марла чын возымо йодышым лончылымо годым тиде пашашке Марий кугыжаныш университетын преподавательже ден студентше-влакым ушымо нерген ойлымо, тидлан посна йылме комиссий лиеш. Вуйверыште ончымо кажне йодыш дене посна пунчалым лукмо.

Мер Каҥаш