17 апрельыште марий калыкын шокшо тургымжо тӱҥалеш. 8-ше марий погын. Тачысе кечылан палемдыме 8-ше погынышто 315 делегат да 600 утла уна-влак лийыт. Паша кышкар почеш Погынын икымше кечыже регистаций дене тӱҥалеш да Шкетан лӱмеш марий кугыжаныш драм театрыште пленар каҥашпогын эрташ тӱҥалеш. Вӱдшор тылзын 18 кечынже Марий Эл мер-политик рӱдерыште ончыч палемдыме секций каҥашпогын-влак эрташ тӱҥалыт. Ушештарена, Погынышто чылажге 4 секций пашам ышташ тӱҥалеш. Тиде Граждан сандалык да мер толкын, Секций вуйлатыше Никандр Поповым палемдыме; Марий ял 21 курым тӱҥалтыште, секций вуйлатыше - Любовь Михеева лиеш; Оласе Марий культур вияҥмын проблемыже-влак секцийым Галина Шкалина вуйлаташ тӱҥалеш. Да 4 - Марий еш да школ секцийым, Светлана Федорова вуйлаташ тӱҥалеш. Тыгак 8-ше марий калык погынышто оньыжам ойыраш тӱҥалыт. Тачысе кечылан оньыжалан 3 кандидатурым палемдаш лиеш. Тиде Владимир Козлов, Анатолий Смирнов да Лариса Яковлева улыт.Марий Эл Республик Президент Леонид Маркелов сонар паша тургым почмо нерген кӱштымашыш кидпалым пыштен. Тыге шошо сонарыш шуматкечын 19 апрельыште лекташ лиеш. Тиде пагыт 27 апрель марте шуйнаш тӱҥалеш. Тыгак пӱртӱсыим аралыме шотышто департаментыште ик суткалан мыняр кайык-комбо-лудым лӱйкалаш лийме нерген палемденыт. Ик суткалан кӱдырым да сузым икте деч шукым огыл лӱяш лиеш, комбым-кумыт деч шуко огылым, а курмузак кайыкым (вальдшнепым) – 5 деч шуко огылым. Сонарыш каяшлан разрешенийым налман. Тидым районысо пӱртӱс аралыме департаметыште налаш лиеш. Комбым, лудым, курмузак кайыкым лӱйкалашлан оксам тӱлыман огыл, а теве ик сузым лӱяшлан 100 теҥгем тӱлыман, а кӱдырлан 20 теҥгем.
«Эн сай туныктышо-влаклан полыш» конкурсышто 14 марий туныктышо сеҥышыш лектын. Мемнан республикыште 93 туныктымо тӧнежыште 15 тӱжем утла руш йоча марий, татар да одо йылме-влакым тунемеш. Мутлан, Параньга ден Морко районласе икмыняр школышто татар йылме ден литературым, Марий-Турек районысо кок школышто одо йылме ден литертатурым тунемыт. Туныкытыш министерствын палемдымыж почеш, республикысе кажне кокымшо йоча марий улеш. Но чылан шочмо йылмым огыт тунем. Туге гынат, марий йылмым туныктыман школлаште туныктышо-влак уло кумылын тыршат. Тидын нерген Туныктыш Виктер палемден.
112 миллион 847 тӱжем теҥгелан кеҥежым икшыве-влак канаш тӱҥалыт. Кодшо ий дене таҥастараш гын, тиде 650 тӱжем теҥгелан шукырак улеш. Палемдыме оксам кеҥежым каныме верыш йоча-влакым кондашлан ямдылыме да ачалыме пашалан ойырат, тышке кочкаш ямдылыме пӧлем, каныме, спорт да модмо верыште профилактик пашам эртараш палемдалтын. Марий Эл мучко кеҥеж жапыште 331 тазалыкым пеҥгыдемдыме тӧнеж пашам ыштышаш. Тышечын 24 ола воктене верланыше улыт, 224 - школ пелен да 57-ше лагерь семын палемдалтеш. Тыгак тазалыкым пеҥгыдемдыме 6 йоча санаторий пашам ыштышаш. Кеҥеж мучко 88 762 йоча каныме верышке лийыт. Тидын нерген Роспотребнадзор Виктем пресс-службо палдарен.
Морко тӱвыра пӧрт калык театр коллектив Иваново кундемышке «Ялысе театрал коллектив» фестивальыш кая. Фестивальыш логалашлан Российын 13 кундем коклаште таҥасымаш эртен. Тышке Морко калык театрын «Ватемым шолыштыныт» спектакльын видеожым колтеныт. Тыге Морко калык театр коллектив фестивальыш логалын. Ынде шке мастарлыкшым Россий кӱкшытыштӧ ончыкташ тӱҥалеш. Фестиваль организатор-влакын палемдымышт почеш, тыгай фестиваль Россий кӱкшытыштӧ 40 ий наре лийын огыл. Тидын нерген республикысе усталык рӱдер увертарен. Фестивальын иктешлымашыже 20 апрельыште лиеш.
Аня Левагина
Увер йогын (mp3)