- Михаил Васютин орден дене палемдалтын.- Самырык специалист-влаклан паша верым пуымо нерген каҥашеныт.
- «Мый шарнем! Мый кугешнем!» девиз дене акций тӱҥалын.
- Грек-рим кучедалмаш гыч 7 шӧртньӧ медальым конденыт.
- Морожныйым ужалыме да шашлыкым ыштыме тургым почылтеш.
Виктер вуйлатышын алмаштышыже, тӱвыра, печать да калык-влакын пашашт шотышто министр Михаил Васютин 2-шо степенян Россий кундемым тӱзатымаште кугу надырым пыштымыжлан орден дене палемдалтын. Суапландарымаш нерген пунчалым 26 мартыште пеҥгыдемденыт. Да теҥгече Москвасе храмыште кучыктеныт.
24 апрельыште Марий Эл Республикын ял озанлык, кочкышвундо да пӱртӱс поянлыкым кучылтмо шотышто министерствыште республикысе муниципал кундем ял озанлык вуйлатыше-влак дене каҥашпогын эртен. Тыште 2008 ийыште тунем лекше-влаклан паша верым пуымо нерген каҥашеныт. Тыгак школышто шинчымашым налше тунемше-влаклан ончыкыжым кӱшыл, кыдалаш шинчымашым пуышо тӧнежлашке тунемаш каяшлан туравеллыкым (направленийым) пуымо йодышым лончыленыт. Тыгак ял озанлыкыште самырык специалист-влаклан кугыжаныш полышым пуымо нергенат каҥашеныт.
24 апрельыште Виктер пӧртын пресс-центрыштыже «Георгиевский тасма» акций почмаш эртен. «Мый шарнем! Мый кугешнем!» тыгай девиз дене тиде акций эрташ тӱҥалеш. Георгиевский тасма - Сеҥымаш кечылан пӧлеклалтше ик тӱҥ тамгалан шотлалтеш да 24 апрель гыч 12 май марте тиде акций эрта. 400 тӱжем утла тасмам Марий Эл мучко пуэдаш тӱҥалыт. Кугу Отечественный сарыште кучедалше-влакым шарныме лӱмеш Российын олалаштыже 2005 ийыште тыгай акцийым эртарыме тӱҥалын да 3 ий жапыште 20 миллион тасмам тӱня мучко шарыме. Сарын ветеранже-влаклан тау мутым ойлымо семын да сарыште вуйым пыштыше-влакым шарныме лӱмеш тиде тасмам миллион дене калык Сеҥымаш кече вашеш пыжыктат.
«Пеҥгыде кап-кылан лийнет гын, кучедалаш тунем!» Юл кундемысе ола-влак коклаште грек-рим кучедалмаш дене турнир эртен. Мемнан спортсмен-влак тушто шым шӧртньӧ медальым сеҥен налыныт. Таҥасымаште чылаже 108 рвезе вийжым терген. Марий Элын командышкыже Йошкар-Ола, Волжск, У Торъял, Шернур спорт школ гыч рвезе-влак пуреныт. Изирак ийготан-влак коклаште 6 шӧртньӧ медаль гыч кокыштым Марий спортсмен-влаклан кучыктеныт. А кугурак ийготан-влак эше талырак лийыныт: 7 медаль гыч визытшым сеҥен налыныт. Каласаш кӱлеш, грек-рим кучедалмаш дене мемнан элысе спортсмен-влак тӱнямбал кӱкшытыштат ончыл верыште улыт. Нунын коклаште эн талыжлан кум гана Олимпийский чемпион Александр Карелин шотлалтеш.
Икмыняр кече гыч Йошкар-Олаште морожныйым ужалыме да шашлыкым ыштыме тургым почылтеш. Мэрын пунчалже почеш, 1-ше май гыч рӱдолаштына 40 наре кенеж кафе, уремлаште морожныйым ужалыше 200 лоток пашам ышташ тӱҥалеш. Кеҥеж кафе, шашлыкым ыштыме да ужалыме вер-влак общепитын стационар предприятийлаж пелен гына почылтыт. Кажне ужалыме вер воктене тыгак биотуалет-влак лийшаш улыт. Весат куандара, май тылзысе пайрем-влак мыланна кок гана кум кече дене канаш йӧным ыштат. Тыге 1-ше, 2-шо да 3-шо майыште да 9-ше, 10-шо ден 11-ше майыште канаш тӱҥалына.
Аня Левагина
Увер йогын (mp3)