Лӱмгече календарь

Идым тылзын визымше кечынже Волжск район Черкысола ялыште шочын-кушшо туныктыш пашаеҥ Василий Сергеевич Чернов шке шочмо кечыжым палемда. Марий кугыжаныш педагогик институтым тунем лекмек, Волжск оласе 4 №-ан школышто пашам ышташ тӱҥалын – вуйлатыше мартеат шуын. Умбакыже оласе комитетыште, а вара уэш туныктымо пашаште шуаралтын. 1991-ше ий гыч 1 №-ан школын вуйлатышыже лийын.

Тиде кечынак шке шочмо кечыжым Вячеслав Семёнович Азаев палемда. Шкеже Дагестан кундем Дербент ола гыч. Саратов оласе мединститутым тунем пытарыме деч вара Йошкар-Олашке толын да оласе эмлыме верыште тыршаш тӱҥалын. 1992-шо ий гыч травмотологий диспансерыште тӱҥ эмлызе семын пашам ышта. Россий Федерацийын сулло эмлызыже.

38 ияш лӱмгечыжым таче Йошкар-Олаште шочын-кушшо спортсмен Евгений Фёдорович Захаров палемда. 16 ияш годымжак тудо регби дек кумылаҥын да политехник институтысо спортклубышто шуаралтын. 8 ий Ташкент олан «Звезда» сборныйыштыже модмо деч вара Израильысе сборныйын тале модшыжо лийын.

Идым тылзын визымше кечынже Елизавета-влакын лӱм кечышт.

Володя Матвеев