6 октябрьыште марий литературын классикше, марий литературылан пеҥгыде негызым пыштыше Сергей Григорьевич Чавайнын шочмыжлан 120 ий темеш. Лач тиде кугу лӱмгече пайрем кечын Марий самырык театр шкенжын 18-ше тургымжым калыкнан лӱмлӧ писательжылан пӧлеклалтше "Сергей Григорьевич Чавайн" спектакльын премьерыже дене почеш.

"Сергей Григорьевич Чавайн" пьесын авторжо Геннадий Гордеевын ойлымыж почеш тиде спектакль гочын лӱмлӧ писательнан илышыжым, чон вургыжмашыжым, куанжым, тыгодымак творчество саскажым кӧргӧ гычак почын ончыкташ шонымо. Тиде шонымашым автор да Самырык театрын творческий коллективше кузерак шуктен кертын? - 6, 7 октябрьыште ужына да аклена.

Тыгеракын, 6, 7 октябрьыште Марий самырык театрын сценыштыже марий литературын классикше Сергей Григорьевич Чавайнын лӱмгече пайремыжылан пӧлеклалтше "Сергей Григорьевич Чавайн" драмын премьерыже. Спектакль Курчак театрын сценыштыже 18 шагатлан тӱҥалеш.