Идым тылзын коло кокымшо кечынже 81 ияш лӱмгечыжым марий калыкын моткочак пагалыме да аклыме артист Виктор Дмитриевич Бурлаков палемда. Советский район Лайсолан эргыже ойырен налме профессийже дене шинчымашым Марий кугыжаныш драмтеатр пеленсе студийыште налын да пел курым тыштак пашам ыштен. Чолга койышан, сылне йӱкан, весела гармонь кумылан артист калыкын чонжым рольым устан чоҥымыж дене савырен. Айста Арбанын «Кеҥеж йӱдысӧ» Марка кумым, Николаевын «Саликасе» Ози Кузим шарналтена. Тӱрлӧ койыш-шоктышан герой-влакым модаш, чынжымак, кугу мастарлык да талант кӱлын. Россий Федерацийын калык артистше.

Туныктыш да шанче пашаеҥ Иван Михайлович Соловьёв таче 68 ийым тема. Шочынжо тудо Звенигово район Исменца селаште. Кӱшыл шинчымашым Марий кугыжаныш педагогик институтышто налын да тыштак шке паша вержым муын. 15 ий историй да филологий факультетын деканже лийын. Тӱҥ шотышто Иван Михайлович кундемнан историйжым шымлен – ятыр шанче пашам савыктен. Историй шанче кандидат. Марий Элын сулло туныктыш пашаеҥже.

А 1951-ше ийыште Йошкар-Олаште спортсменка Тамара Викторовна Даунене шочын. 12 ияш годымжак тудо баскетбол деке шӱмаҥын. Но 1966-шо ийыште ача-аваж дене пырля Майкопыш илаш куснен. Ленинградысе, Ригысе, Москосо командылаште шуаралтын. Ятыр первенствын да чемпионатын сеҥышыже лийын. Европын да тӱнямбалсе чемнионка лӱмым нумалеш. А 1976-шо ийыште Тамара Викторовна олимп чемпионка лӱмым сулен. Совет Ушем спорт мастер. Кызыт Москошто ила да спорт школышто тренерлан тырша.

Тачысе лӱмгече календарьнам поснак ик пайрем сорастара. Айста, йолташ-влак, «Ау», «Ну мо вара», «Колхоз» муро-влакым шарналтена. Кӧ нуным йоҥгалтара? Чын! Уста гармончо – Виктор Комаров! Тудат таче шке шочмо кечыжым палемда! Шочынжо мурызо Советский район Кельмаксолаште. Гармонь почеш йоҥгалтарыме мыскара сынан, кумылым тарватыше мурылаж дене кумдан чапланен.

Идым тылзын коло кокымшо кечынже шке лӱмгечыштым Анна ден Иосиф-влак палемдат!

Володя Матвеев