Варажым эре больницыште лийынам, манаш лиеш. Мылам Уфаште чылаже 16 операцийым ыштеныт. Шӱргыштӧ коваштым пӱтынек вашталтеныт. Но качественно ыштен огытыл. Очыни, изирак улмем годым тыгай мотор огыл чуриян улмемлан пешыжак ойгырен омыл, но кызыт, ийготым погымек, ужам: мый урод улам. Ӱмбакем ончалаш лӱдат. Шӱргӧ мучко - шрам ден операций деч вара кодшо пале-влак. Нерын формыжо веле кодын, пылышем йӧршеш йӱлен пытен, олмыштыжо кок рож веле. Шинчам ик ганат петырен ом керт, коваштым вашталтыме годым чот шупшыл шынденыт. Ик шинчам йӧршеш ужмым чарнен, весыжат удан ужеш. «Шинчатым петыраш операцийым от ыште гын, йӧршеш сокыр лийын кертат», - ойлат врач-влак. Мылам эше тиде гына ситен огыл. Молан Юмо тынар ойгым пуэн?Уремыш лекташ вожылам. Чылан вет еҥын ойгыжым огыт умыло. Иктышт шинчашкем онченак воштылыт, весышт почешем мыскылаш тӧчат.
Но мый вуйым сакымаш уке, тӱрлӧ эмлымверыш коштам, тӱсемым моторракым ыштынем. 16 операцийым чытенам гын, эше чыташ ямде улам. Теве шукерте огыл Екатеринбургыш косметологий ден пластика хирургий рӱдерыш мийышна. Тушто мыйын чуриемым тӱрыс тӧрлен, мотор ӱдырым ыштен кертыт. Но тидлан, шоналташат ӧрат, 500 тӱжем теҥге кӱлеш. Кушеч тыгай оксам муаш?
Авам шкенан ялыште кевытчылан ышта, ачам шукерте огыл Йӱдвелыш вахта дене пашаш кошташ тӱҥале. Тудлан 25 тӱжем теҥгем тӱлат. Ешыште вич йоча кушкына. Пожарыште шӱжарем колымек, авам кок тулык эргым йоча пӧрт гыч ашнаш нале. Тунамак тудо мӱшкыран ыле, ӱдыр шочо. Тудлан – 10 ий. А ик ий ончыч ешыште эше ик йоча ешаралте.
Илышыштем эн кугу шонымашем – мотор лияш. Ӱмбакем еҥ-шамыч молын семынак ончышт. Молын семынак иктаж-вере тунемнем, чонлан келшыше профессийым налнем. Моло ӱдыр гаяк ешым погынем, йочан лийнем. Рыскалан лийнем».
Мутат уке, Людан ешыжат изин-изин оксам пога. Ӱдыр шкежат вургемым урген ужала. Но шке гына нуно тидым кунам чумырен шуктат, ала. Операцийланат ак кушкеш. Тыге шоналташ гын, тиде оксам иканаште луктын пышташ шукыла чучеш. А кажнына кеч 100 теҥге дене колта гынат, садак погына. Те ты оксам пуымо дене огыда нужнаҥ, но весылан поро сомылым ыштеда. Кӧ пала, мо мемнам ончылно вуча? Вес гана шкаланна полыш кӱлмӧ годым ала вес еҥат тыгак кидшым шуялта.
Мишкан районысо инвалид-влак обществын председательже Татьяна Сухоева тиде ӱдырлан полшымо сомылым шукертак тӱҥалын. Интернетысе чыла сайтыш тудын нерген уверым колтен. Людмила – шонен лукмо айдеме огыл, тудо чынжымак Метръялыште ила, полышым вуча. Ондален, оксам погат манын, ида шоно. Мый шкежак тидын шотышто чыла документым йодынам, тергенам.
Айста ваш полшена. А вара, жап шумеке, мотор Людмилан сӱанышкыже рӱж погынена.
"Кугарня" газет
Почувствуй себя человеком
Нужна помочь девушке-марийке!