«Сылнымут шыже» самырык мутмастар-влакым чумыра. 23 октябрьыште Йошкар-Олаште руш да марий йылме дене почеламутым, прозым, драмым возымаште шкеныштым тергыше-влак республикысе семинарыш чумыргат. 60 наре ончыкылык поэт, писатель, драматург чапланыше мутмастар деч тунемаш тӱҥалыт. Нунылан каҥашым Писатель ушемын енже-влак Елена Хисамутдинова, Марина Копылова, Юрий Галютин, Анатолий Тимиркаев, Светлана Григорьева, Юрий Соловьев, Зоя Дудина пуат. Самырык мутмастар-влакын эн сай пашаштым 2010 ийыште лукташ палемдыме «Дружба» да «»Эрвий» альманахыште, «Марий Эл» газет, «Ончыко» журналыште савыктат.

Санкт-Петербург гыч тоштер паша дене шанче институт Марий Элыште тоштер пашеҥ-влаклан семинарым эртарен. Тудыжо Тимофей Евсеев лӱмеш тоштерыште лийын. Семинарын темыже: «Музей фонд-влакым кугыжаныш дене аралымаш». Тӱҥ шотышто тӱвыра пӧлка вуйлатыше, тоштер пашеҥ-влакым музей экспонат да колекций-влакым аралыме шотышто документ дене пашам ышташ туныктеныт. Марий Элыш тунемаш мемнан республикысе тоштерла гыч, Чуваший, Киров область гыч специалист-влак толыныт. Семинарыш толшо-влаклан тоштер паша нерген документым да электрон книгам пуэныт, увертарен Тимофей Евсеев лӱмеш кугыжаныш тоштерын методист пӧлкан вуйлатышыже Зинаида Иванова.

Марина Глушкова