Чон куаным «Марий Эл Радио» пӧлеклен. Эртыше шуматкечын, 24 октябрьыште Йошкар-Олаште 21 курымышто икмыше гана 80-90-ше ийлаште чапланыше ансамбль-влак ик сценыште вашлийыныт. «Лӱҥгалтыш», «Шочмо вер», «Шуматкече», «Энсул», «Аяр», «Союз» шоктышо да мурышо ансамбль-влак калыкын йӧратыме мурыштым йоҥгалтареныт. Чынжымак, нине ансамбль-влак йӧратыме улыт, вет Йошкар-Олан ик эн кугу тӱвыра полатыштыже концерт кечын шинчаш вер лийын огыл. Ты ансамбль-влакым иквереш чумыраш да калыклан ончыкташ шонымаш дене Марий Эл Радион вӱдышыжӧ Сергей Карпов лектын, тудак ты проектым илышыш шыҥдарен. Ончыкылык шонымаш дене ты концертын видеоверсийжым ыштен лукамаш, садланак кӧ концертыш толын шуктен огыл, але кӧлан вер ситен огыл гын, вучыза ты концертын видоверсийжым.

Марий Элын рӱдӧ олаштыже еш мыскаран фестивальже лийын. 1000 наре ен КВН дене модшо 8 командым ончаш толын. Мероприятийын девизше- «Мыскара мемнан вӱрыштак». Мыскараче-влак мыскара гоч шке кумылын вӱрым пуымо, донор-влакым шукемдыме темым тарватеныт. Фестивальыште самырык-влакын тӱрлӧ командышт вийыштым тергеныт. Ончаш толшо-влак мыскара дене каненыт веле огыл, тыгак кузе донор лияш пален налыныт. Йошкар-Олаште «Доноры- детям» организаий толшо-влаклан донор лийме шотышто брошюрым пуэденыт. Донор лияш неле огыл. Тазалык ден чарак уке гын, паспортым налын, республикысе вӱрпуымо станцийышке кайыман.

Марина Глушкова