Самырык-влакын идалыкшт дене иктешлымашым ыштыме, ынде Марий Элыште туныктышын идалыкышым вашлияш ямдылалтыт. Тудо 19 декабрьыште тӱҥалтышым налеш. Шуматкечын М.Шкетан лӱмеш кугыжаныш театрыште Марий Элыште туныктышын идалыкшым почмаш эрта. Ушештареш ойлаш гын, тений Дмитрий Медведев шке кӱштыкыштыжӧ 2010 ийым туныктышын идалыкше семын увертарен. Тидын шотыштак распоряженийым Марий Элын Президентше луктын.

Декабрь тӱҥалтыште Марий кугыжаныш университетын тӱнямбал кыл факультетыштыже «Общественность дене кыл» специальность дене икымше студент олимпиада эртен. Тушко 2-5-ше курслаште тунемше-влак ушненыт. Таҥасыше-влак йот йылмым (англичан, француз да немыч) да тунемме дисциплина-влакын теорийыштым палымышт дене шинчымашыштым тергеныт, «Эн сай пресс-релиз», «Факультет нерген йот йылме дене возымо эн сай ойлымаш», «Эн сай PR-проект» конкурслашке ушненыт. Личный первенствыште студент-влак тест полшымо дене вашештеныт, пресс-релизым мӧҥгысӧ паша семын заочно возеныт, командный таҥасымаш пытартыш кок номинаций дене эртен. Эн нелыже – ойырымо жапыште йот йылме дене факультет нерген имидж материалым ямдылаш кӱлын. Жюри участник-влакын йот йылмым, теорий ден практикым, PR-технологийым сайын палымыштым пеҥгыдемден. Олимпиадым иктешлымеке, пале лийын: 5-ше курсын командыже – 1-ше лийын, 2-шо верыште – 4-ше курс, кумшышто - 3 курс. Лишыл жапыште сеҥыше-влак кокла гыч МарГУ-н командыжым погат, тудо 2010-шо ий мартыште Озаҥ олаште «Общественность дене кыл» специальность дене российысе олимпиадыште таҥасаш тӱҥалеш, палдара Марий кугыжаныш университетын пресс-службыжо.

Марина Глушкова