04 июль

Тачысе абитуриент-влак тунем пытармек, у тӧртык дене пашам ышташ тӱҥалыт. Минздравсоцразвитий Паша кодексыш вашталтышым пуртымо дене пашам тӱҥалын. Тыге закон-влак кокла гыч тунемме жаплан налме тӱлымо отпускым кораҥдаш палемдат. Тыгак социал страховатлыме йодышым лончылаш тӱналыт. Тыштыже страховатлымым кугемдыме дене гына огыл, тыгак тазалыклан эҥгекым кондымымат шотыш налыт. Вашталтыш-влак паша лектышым кугемдыме да кадр йодышым вораҥден колтымо дене кылдалтеш. Молан манаш гын, тпачысе кечын паша специалист-влак ситыдымаш – тиде ик тӱҥ йодыш семын лончылалтеш. Специалист-влак палемдат, 2009 ийлан пашадарын эн изи кугытшо 4330 теҥге лийшаш. Тылеч посна ноябрь тылзыште ик кумымшо ужашлан кугыжаныш пашаеҥ-влакын пашадарышт кугемшаш.

1 июльышто ял озанлык министр Александр Егошин кундемысе муниципал кундем вуйлатыше, ял озанлык виктем вуйлатыше да тыгак тиде йодыш дене чак кылдалтше предприятий вуйлатыше-влак дене каҥашпогыным эртарен. Семинар паша кышкар почеш кӱкшӧ качестван кугым ямдылыме, пасушто ӱдымӧ кушкылым аралыме йодышым нӧлталыныт. Тыгак уржа-сола жаплан техникым ямдылыме пашам лончыленыт. Семинарыш толшо-влак Медведево районысо «Тепличное» ял озанлык предприятийышке миеныт. Тушто нунылан сенажым ямдылыме технологийым ончыктеныт да кургым ямдылыше техникын пашаж дене тӱрысынек палдареныт.

«Йошкар-Ола-Казань корным тӧрлаш тӱҥалыт». «Медведево» корным тӧрлышӧ пашаеҥ-влакын палдарымышт почеш, тиде паша 15 июль гыч 15 август марте шуйнаш тӱҥалеш. Тидыже 33-шо километр гыч 41 километр марте асфальтым пыштыме дене кылдалтеш. Ты трассым ачалыме жапыште корным огыт петыре, а лач пашам шуктымо верым жаплан авырат. Тиде трактым уэмдашлан тений 39 миллион теҥгем ойырымо.

«Тулык йоча-влаклан газет ден журналым пӧлекленыт». Кундемна мучко 2008 ийын кокымшо пелыжлан газет да журналлан возалтмаш эртен. Тидын дене кылдалтын, кундемысе «Почта России» филиал «Уло шӱм-чон деч» акцийым эртарен. Тидыже тулык йоча-влаклан полыш семын лийын. Тыге 99 экземпляр йоча газет да журналлан возалтме. Организаций пресс-службын палдарымыже почеш, акций эртыме годым кугу полышым «Электроконтакт» ушем пашаеҥ-влак ыштеныт. Нуныжо эн шуко йоча изданийлан возалтыныт.

«Ӧрдыж кундемыште илыше-влаклан журналым ямдылат». 8-ше Марий калык погынышто Марий Эл президент Леонид Маркелов Марий тӱнян илышыж нерген палдарыше да кундемысе увер-влак дене палдарыше газетым лукташ мутым луктын ыле. Тачысе кечылан пале, тиде идалыклан 4 гана лекше журнал лиеш. Журналын тӱҥ редакторжо Лариса Николаевна Яковлева лиеш, а шеф редактор сомылым Валерий Александрович Мочаев шукташ тӱҥалеш.

«Иномарке машинам Йошкар-Олаштат налаш лиеш». 3 июльышто «ТрансТехСервис» холдингын пресс-конференцийже эртен. Тыште нуно журналист-влаклан компаний нерген палдареныт. Да палемден коденыт, ондак тыгай машинам Озаҥ олаште налаш лийын гын, кызыт тыгай ак денак иномарке-влакым Йошкар-Олаште налаш лиеш. Палдарена, «ТрансТехСервис» холдинг – Юл кундемыште автомашинам ужалыше эн кугу компанийлан шотлалтеш. Тудо 21 автомобиль маркын диллерже улеш.

Аня Левагина

Увер йогын (mp3) скачать dle 10.2 КиноСвин
Автор: user | Дата: 4 июля 2008 | Просмотров: 5086 Коментарии: 0
    • Для того чтобы написать комментарий к этой новости, пожалуйста, нажмите сюда.


    Яндекс.Погода Яндекс.Метрика
    Архив новостей
    Популярные новости