Чыланат палат Чумбылат курык улмо нерген. Тудын нерген быль, миф, легендым шуко возымо.Мемнан кундемыштат тыгай вер-влак улыт: Ӱкӱдӧ курык да Кеней курык.
Ӱкӱдӧ курык Башкортостанын, Пӱрӧ (Бирский) районым кокыте шелын шогышо Ошвиче эҥерын шола велыштыже водораздел кӱкшака ӱмбалан верланен. Ӱкӱдӧ курык воктене Ӱкӱдӧ ял. А Кеней курык Ош Вичын пурла велыштыже верланен. (Снимкыште Ӱкӱдӧ курык вуй гыч мӱндырнӧ Кеней курык коеш).Ӱкӱдӧ курыкым 270 ий ожнак Ош Виче воктеке куснен толшо марий кугезына-влак шӱлышан верлан шотлен кумалтыш верлан ойыреныт.
Тидлан верчынак нуно курыук вуеш кум куэм шынденыт да кажныжлан лӱмым пуэныт: шола тӱрыштӧ шогышыжлан "Сак Султан", пурласе куэжлан "Игын Султан", покшел куэжлан "Куэ тӱҥ", кудыжо Онапулан шотлалтын. Тыге Ош Вичын шола могырыштыжо Марий кумалтыш шочын.
Теният Сӱрем тылзын 17-ше кечыште (17 июльышто) Ӱкӱдӧ курык вуйышто марий калыкын кумалтыш эртен. Кумалаш Москваште, Уфаште, Уренгойышыто, Нефтекамск, Пӱрӧ (Бирск) олаште илыше да моло марий-влакат толыныт.Кумалтыш пеш сай эртен. Кумалаш толшо-влак икте-весыштлан «Кумалтышна кавыл лийже!» манын пелештеныт.
Бухаров Исиляй Бухарович.
Памаш ял, Пӱрӧ (Бирский) район, Башкортостан.
Фото: Вачисын.