Сӱрем тылзын кумшо кечынже ГИБДД пашаеҥ–влакын кечышт палемдалтеш.

Тиде кечын 1926-шо ийыште Санкт-Петербургышто артистка Нинель Александровна Константинова шочын. Кундемнан моткоч пагалыме артист Георгий Константиновын пелашыже. Тудат Руш академ театрыште актрисылан ӱмыржӧ мучко тыршен: 50 утла рольым устан чоҥен, кудышт коклаште Эдит Пиафын, Гелян, Айседора Дунканын рольыштым поснак палемдыман. Образын койыш-шоктышыжым чон дене шижын модын моштен. Тидлан, мутат уке, калык пагалымашым сулен. Россий Федерацийын калык артисткыже.

78 ий ончыч сӱретче Борис Сергеевич Пушков шочын. Пейзажым сӱретлымыж ден марий сӱрет тӱняште икымше профессионаллан шотлалтеш. «Марий сӱретче» ушемын чолга еҥже. «За молодых!» да «Песня» триптихлан кугыжаныш премий дене палемдалтын. Пашаже-влак Москосо, Ижевскысе, Озаҥысе, Йошкар-Оласе ончерлаште лийыныт. Россий Федерацийын сулло сӱретчыже.

Транспорт пашаеҥ Аркадий Александрович Степановлан – 66 ий. Шкеже Провой кундем Нуктуж ял гыч. 20 ий наре Звенигово районысо автотранспорт ушемыште автобус вӱдышылан тыршен, а вара тыштак апшат сомылым шукташ тӱҥалын. Россий Федерацийын сулло транспорт пашаеҥже.

Сӱрем тылзын кумшо кечынже Андрей, Глеб, Инна, Лука, Наум, Римма, Фома, Анатолий–влакын лӱм кечышт.