Йошкар-Олаште Родион Охотинын уремже лиеш. Тудын лӱмжым Йошкар-Оласе «Звёздный» микрорайонышто чоҥалтше у уремлан пуымо шотышто пунчалым Марий Элын рӱдо олан мэрже Олег Войнов пеҥгыдемден. Ойлен кодаш лиеш, Родион Охотин – Провой кундем Олыктӱр ялыште 1907 ийыште шочын. Тудо фин сарым эртен, Кугу ачамланде сарыште виян партизан бригадым вуйлатен, тудын оҥышыкыжо эн кӱкшӧ орденым пыжыктеныт. Сар деч пӧртылмеке, Родион Охотин тӱшка озанлыкым сайын вуйлатен. Мут толмашеш, Йошкар-Оласе «Звёздный» микрорайоныштак «Курск» вӱдйымалсе пушышто ӱмыр лугыч лийше мичман Шаблатов; драматург, композитор Николай Арбанын лӱмыштым нумалше урем-влак улыт. Ынде ты урем-влак воктене Кугу Сарын геройжо, Марий калыкын талешкыже Родион Артемьевич Охотинын лӱмжым нумалше урем лиеш.

Шукерте огыл Марий сылнымутышто эше ик авторын у книгаже лектын. Ираида Степанова мутаршашыжым черетан сборникыш чумырен да тудым «Сай ма!» манын лӱмден. Ираида Александровна Степанова - шкаланже Шымакшан псевдонимым ойырен. Мутмастар, тӱрлызӧ - Куженер район Визым ялеш 1959 ий 3 октябрьыште шочын. «Сай ма!»- Ираида Шымакшанын почеламут да муро-влакым иктеш чумырымо кокымшо сборникше. Икымше сборникше 2007 ийыште ош тӱням ужын, тудо «Мутшер» маналтын. Ираида Александровнан ойлымыжо почеш, тудо эн ончыч почеламут-влакым руш йылме дене возаш тӱҥалын, марий йылме дене почеламутым шкенжын 40 ийже деч вара веле кагазыш пышташ тӱҥалын. У сборникыш пуртымо почеламутлаште автор Юмо, Мланде Ава, Вӱд Ава дене мутлана, пӱртӱсым аралаш ӱжеш, йӧратымашын тулышто йӱлен, шижмашыжым почеш. Тыгак Ираида Александровна мыскара дене илышым акла.

Марина Глушкова