1 октябрьыште Российыште илыше кажне кумшо еҥын пайремже. 1 октябрь - илалше-влакын кечышт. Тиде пайремым эртараш Марий Элын виктерже 300 тӱжем теҥгем, Российын Пенсий фондшо 200 утла тӱжем теҥгем ойыреныт. 880 наре пашадыме пенсионерлан тиде кече вашеш окса полышым пуат. Социал аралтыш министерствын пресс-службыжын увертарымыже почеш, 1 октябрьыште республикын чыла районлаштыже тиде кечылан келыштарыме пайрем, вашлиймаш-влак лийыт. Йошкар-Олаште, мутлан, олан историй тоштерыштыже илалше-влакым уло кумылын вучат, а тӱвыра полатлаште концерт-влак эртат. Каласыман, илалше-влакым четлык коклаштат саламлаш тӱҥалыт. Наказанийым шуктышо виктемын палдарымыже дене каласаш лиеш, Марий Эл республикысе колонийлаште 60 ийым эртыше 45 еҥ шинча. Эрык деч посна кодымаште улыт гынат, нунын дене вашлиймашке социал пашеҥ, пенсий фондыште тыршыше-влак мият.

1 октябрьыште Йошкар-Олаште илыше-влакын пачерыштышт шокшо лиеш. Йошкар-Олан мэрже Олег Войнов тидын шотышто пунчалым пеҥгыдемден. Олтымо тургымлан ямде улмо нерген паспортым налын шуктышо организацийлашке, социал тӧнежлашке, пӧртлашке шошкым пуэн шуктышаш улыт.

Марина Глушкова