Марий Элын энциклопедийын икымше тиражше республикын шочмо кечыже - 4 ноябрь вашеш лекшаш. Ончыч энциклопедийым 3 тӱжем 500 экземпляр дене луктыт. Ты энциклопедийыште Марий Элын историйже, кызытсе илышыжлан келыштарыме статья-влакым лийыт. Валериан Васильев лӱмеш шанче-шамлыше институтын пашаеҥже-влак кӱжгӧ пашам ыштеныт. Книгашке георгафий, историй, тӱвыра, экономик нерген уверым чумыреныт. Ты энциклопедийым ышташ оксам Марий Элын бюджетше гыч ойыреныт. Энциклопедийшке кум тӱжем наре статья пура, нуным шанчыеҥ, тӱрлӧ специалист-влак возеныт. Тушто ик тӱжем 200 наре фотосӱрет, схема, таблице, карт улыт. Энкциклопедийым ик кугу том дене луктыт, но а вара, историй, тӱвыра, экономик, чоҥымаш да моло отрасль дене ешартыш книгам луктыт. Марий Элын энциклопедийже чыла кумылан-влаклан оҥай лиеш.

5 октябрьыште Марий самырык театр у тургымын икымше премьерыжым ончыктен. Тиде гана артист-влак Александр Пушкинын «Руслан и Людмила» поэмыже почеш спектальжым модыныт. Спектальыште Русланын образшым – Артем Иркабаев чоҥа, Людмилам - Ольга Ошаева, Ратмирым- Александр Кожевников модыт. Спектальлан музык сылнылыкым Вениамин Захаров пуртен. А эрла, 6 октябрьыште самырык театр шке тургымжым Валерий Григорьевын «Ава шӱм» спектальже дне почеш.

6 октябрьыште Марий писатель Сергей Чавайнын шочмо кечыже. Тудо 1888 ийыште Морко район Изи Корамас ялыште шочын. 1905 ийыште «Ото» лӱман икымше почеламутым возен. Ты мутмастарын ик эн кугу произведенийже – «Элнет» роман. Сергей Чавайн 37 ийыште репрессийшке логалын. Но тудын пашажым калык акла. Сергей Чавайнын лӱмжым Йошкар-Олаште книгагудылан, Марий Элын рӱдӧ олаштыже бульварлан, уремлан пуэныт. Йошкар-Олаште да шочмо кундемыштыже Сергей Чавайнлан чапкӱм шогалтеныт.
6 октябрьыште 2009 ийыште Йошкар-Олаште Сергей Чавайнын усталыкшылан пӧлеклалтше Чавайн лудмаш эрта. Тудым С. Чавайн лӱмеш книгагудын пашаеҥже-влак эртарат.

Марина Глушкова