Марий кечышот почеш, 25 майыште Агавайрем пура. Тиде кечын Марий Элысе яллаште Агавайрем кумалтышыш лектыт. Агавайремым эртарыме жап кажне ийын ик семын ок тол. Тудым шошо ага тӱҥалме деч ончычат пайремлат, но шукыж годым шошо агам мучашлымеке- 22 май кеҥеж Миколо ден Мланде шочмо кече(тений 28 майыште) коклашке. Агавайремлан калык шот дене ямдылалтын: эр кынелын, мончаш олтен, ӱдырамаш-влак коман мелнам кӱэштыт, торык подкогыльым шолтат, торык дене коҥга когыльымат ыштат, туарам, моло кочкышым ямдылат, муным шолтат да шоган шумыштӧ чиялтат. Вет муно Агавайремын кугун йӧрытме кочкышыжо лийын. Молан манаш гын, муно-илыш тӱҥалтышым ончыкта.
Агавайрем кумалтышыш чылан сӧрал ош вургемым чиен лектыныт.
Каласыман, Агавайрем ото тыглай кумылтыш вер деч вес вере верланен. Ожно Агавайрем кумалтыш-влак Шернур район Оно-Морко Купсола кундемыште Агавайрем отышто мучашлалтыныт. Тений Оно-Морко отышто кумалтыш 13 июньышто лиеш. Тыгак тиде идалык гыч, республикыште Агавайрем кумалтышым кумдаҥдаш шонымаш уло, садланак 20 июньышто Йошкар-Ола воктене Тумер Отышто Кугу Агавайрем кумалтыш лиеш. Тушто республик гыч чыла онаеҥ-влак толын, кумалтышым эртарат. А вара Пеледыш пайрем лиеш. Тушко Марий Элын чыла районлаж гыч уна-влак толшаш улыт.

Марий Элыште «Идалыкын предпринимательже» конкурсым иктешленыт. Тушто шке вийжым 20 амалкалче терген. Экономик вияҥме министертсвын палдарымыже почеш, «2009 ийын Предпринимательже» номинацийыште Курыкмарий гыч амалкалче Андрей Бабушкин ончылно лийын. «Ӱдырамаш вуйлатыше» лӱмым Килемар район гыч Татьяна Трофимова сеҥен. Идалыкын самырык вуйлатыше - Медведево район гыч Константин Бастраков.

Марий Эл гыч Кугу сарын ветераже-влак Российын кеч-могай кундемышкыже яра чоҥештен кертыт. Тыгай йӧным «Аэрофлот» темла. 28 май марте Кугу сарын ветеранже, инвалид-влаклан Российын регионлашкыже, СНГ, Европа эллашке самолет дене каяш билетым яра пуат. Тудым налаш паспорт, Кугу сарын ветеранжын удостоверенийже пелен лийшаш. Республикысе социал аралтыш министерствын пресс-службыжын палдарымыже почеш, яра билетым корнын кок могырышкыжат пуат.

Марина Глушкова