25 майыште Йошкар-Олаште, “Автодор” тӱвыра полатыште, марий бард-мурызо, Марий самодеятельный муро фестивальын лауреатше, ятыр мурын авторжо Геннадий Григорьев 50 ияш лӱмгечыжлан пӧлеклалтше пайрем касым да «Корныеҥ» муро сборникшын презентацийжым эртара.

Тиде авторын «Ош куэ» мурыж дене вӱдылалтын, ятыр тукым кушкын. Тыгак «Пустаҥше пӧрт», «Йӧратымашын ӱмыржӧ кандаше», «Усола», «Корныеҥ» да моло мурыжо кумылнам савырат. 16 мурыжым чумырен, посна сборник дене савыктен лукташ тений тудлан Марий Элын Писатель ушемже полшыш. Кызыт Геннадий Григорьев «Югорно» бард-клуб дене пеҥгыде кылым куча, самырык-влаклан усталык пашаштым вияҥден колташ полша. Шкежат тудо ятыр у мурым возен. Нуным концертыштыже йоҥгалтараш тӱҥалеш. Геннадий Григорьевын 50 ияш лӱмгечыжлан пӧлеклалтше пайрем касым лӱмлӧ мурызо-влак, Марий Элын сулло артистше-влак А.Изибаев-Бирь, Т.Денисова, тыгак В.Петров, Л.Сидоркина, «Югорно» бард-клубын участникше-влак да молат сӧрастараш полшаш тӱҥалыт.

Пайрем кас 18.00 шагатлан тӱҥалеш.